Ерөнхийлөгч Макроны тэтгэврийн системийг шинэчлэх төлөвлөгөөг эсэргүүцсэн нийт үндэсний хэмжээний ээлжит эсэргүүцлийн ажиллагаа Франц даяар өрнөлөө. Нийслэл Парист энэ эсэргүүцлийн ажиллагааны үеэр эмх замбараагүй байдал үүсч, цагдаагийнхантай мөргөлдөөн гарчээ.

Парис, Ницца, Марсель, Тулуз, Нанте зэрэг Францын өөр олон хотод 960 мянга гаруй хүн энэ эсэргүүцлийн ажиллагаанд нэгдсэн байна. Францын Дотоод хэргийн яам энэ тухай мэдээлжээ. Зөвхөн Парист гэхэд 93000 орчим хүн жагссан нь өнгөрөгч 1-р сард эхэлсэн эсэргүүцлийн ажиллагааны турш дахь хамгийн олон хүн болж байна. Ажлын өдрүүдэд жагсаал цуглаанд төдийлөн оролцож чадахгүй байсан оюутнууд зэрэг хүн амын бусад бүлгийн төлөөлөл амралтын өдрүүдэд жагсагчидтай нэгджээ. Энэ үеэр нисэх буудлуудын диспетчерүүд урьдчилан зарлалгүй ажил хаялтад нэгдсэний улмаас францын нийслэлийн хоёр дахь том, Орли-гийн нисэх буудлаас хөөрөх болон хүлээж авах нислэгүүдийн тал хувь нь шахуу цуцлагдсан байна.

Мөн үе үе эмх замбараагүй байдал, цагдаагийнхантай мөргөлдөөнд хүрч байсан эсэргүүцлийн ажиллагааны дараагийнхныг 2-р сарын 16-нд явуулахаар төлөвлөжээ. Тэтгэврийн системийн шинэчлэл бол Францын Ерөнхийлөгч Макроны сонгуулийн өмнөх гол амлалтуудын нэг юм. Ерөнхий сайд Елизабет Борны гол заалтуудыг нь дэвшүүлсэн энэ шинэчлэлийн хүрээнд тэтгэврийн нас 62 байгааг 64 болгож ахиулах, ажилтны тэтгэврийн санд хураамж төлсөн байх хугацааг доод нь 43 болгож нэмэгдүүлэхээр тусгаад байгаа юм. Үүний зэрэгцээ тэтгэврийн доод хэмжээг сарын 1200 евро болгож өсгөнө гэж Засгийн газраас мэдэгдэж байгаа юм байна.

Ийм шинэчлэлийн зорилго нь 2030 онд 20 тэрбум еврод хүрч мэдэхээр байгаа Францын тэтгэврийн сангийн алдагдлаас зайлсхийх явдал гэж Ерөнхий сайд Борн мөн нотолж байна. Харин үйлдвэрчний эвлэлүүд болон барууны популист “Үндэсний нэгдэл”, зүүний улстөрчид эрх баригчдын энэ төлөвлөгөөг ажил эрхэлдэг франц хүн болгон, тэр дундаа хөдөлмөрийн харилцаанд эрт орсон болон улсын дунджаас доогуур наслах эрсдэлт бүлгийнхний хувьд хүлээн зөвшөөрөхийн аргагүй туйлширсан гэж үзэж байгаа юм байна. Тэтгэврийн шинэчлэл парламентын олонхын дэмжлэг авч чадахгүй нөхцөлд засгийн газарт итгэл эс үзүүлэх шийдвэр гараагүй л бол Ерөнхий сайд Үндсэн хуулийн 49-ийн 3 дахь заалтыг ашиглаж, санал хураалтгүйгээр хуулийг батлах боломжтой байна.