АНУ Сирийн бүх сөргөлдөгч талд хандаж, тусламжийн цуваануудыг саадгүй нэвтрэх зөвшөөрөл олгохыг уриалжээ. НҮБ-ын төлөөлөгч өмнө, тодорхой нэг зэвсэгт бүлгээс зөвшөөрөл олгохгүй байгаагийн улмаас Сирийн засгийн газрын хяналтан дахь бүсүүдээс газар хөдлөлтөд өртсөн босогчдын мэдлийн нутгууд руу тусламж хүргэх ажил саатаж байгааг мэдээлсэн юм байна. “Хилийн бүх боомт гарцаар хүмүүнлэгийн бүх тусламжийг саадгүй нэвтрүүлэхийг зөвшөөрөх ёстой.

Мөн тусламжийг алгуурлалгүй гамшигт өртсөн бүх бүс рүү хуваарилж тараах шаардлагатай” гэж Цагаан ордны Үндэсний аюулгүй байдлын зөвлөлийн төлөөлөгч мэдэгджээ. Вашингтон Сирийн ерөнхийлөгч Башар Аль-Ассадыг тусламж шаардлагатай бүх хүмүүст нэн даруй хүмүүнлэгийн тусламж хүргэх боломжоор хангаж, хүмүүнлэгийн тусламж хүргэлтэд бүх талын дэмжлэг үзүүлэхийг уриалсан байна. НҮБ-ын хүмүүнлэгийн тусламжийн асуудал эрхэлсэн тэргүүн Мартин Гриффитс Сирийн баруун хойд бүсэд байгаа хүмүүст тусламж хүргэх олон улсын хамтын нийгэмлэгийн хүчин чармайлт өнөө хэр доголдож байгааг мэдэгдэж, “тэндэх хүмүүс бүрэн орхигдож” байгааг онцолжээ. Өнөөдрийг хүртэлх хугацаанд Сирид газар хөдлөлтөөр амиа алдсан 3500 гаруй хүний дийлэнх хувь нь тус улсын баруун хойд талын “Хайет Тахрир аш-Шам” нэртэй бүлгийнхний хяналтад байдаг нутагт бүртгэгдээд байгаа юм.

Энэ зуур Турк-Сирийн газар хөдлөлтийн уршгаар амиа алдсан хүмүүсийн нийт тоо 33 мянгаас давж, аврагчид аврах ажиллагаагаа үргэлжлүүлсэн хэвээр байна. Туркт амиа алдсан хүмүүсийн тоо 29605-аар тоологдож байгаа бол, Сирийн тухайд 3500 гаруй гэдэг тоо сүүлийн хоёр өдөр шинэчлэгдээгүй байна. НҮБ-ын мэдээгээр, Сирид 5,3 сая шахам хүн орох оронгүй болж хоцорсон бол, Турк, Сирийн хэмжээнд халуун хоол хүнсний гачигдалтай 900 мянгаад хүн байна гэв.