АНУ-ын төрийн нарийн бичгийн дарга Энтони Блинкен энэ 7 хоногийн сүүлээр Германд болох Аюулгүй байдлын асуудлаарх Мюнхений бага хуралд оролцоно. Энэ үеэрээ тэрээр Хятадын Гадаад бодлогын тэргүүлэх улстөрч Ван И-тэй уулзаж, тагнуулын гэгдэж байгаа бөмбөлгүүдийн асуудлыг хэлэлцэж магадгүй гэдэг таамаг нэлээд газар аваад байгааг хэвлэлүүд дамжуулж байна.

Энэ 7 хоногийн баасан гарагаас эхэлж 3 хоног хуралдах 59 дэх удаагийн Мюнхений Аюулгүй байдлын бага хуралд тнбд Энтони Блинкен оролцоно гэдгийг АНУ-ын Төрийн департамент өчигдөр зарласан юм. Харин Хятад улсаас энэ чуулга уулзалтад ХКН-ын Улстөрийн товчооны Гадаад хэрэг эрхэлсэн гишүүн Ван И оролцохыг тус улсын Гадаад яам даваа гарагт мэдээлсэн юм. Гэхдээ Блинкен, Ван И нар Мюнхений бага хурлын үеэр уулзахаар төлөвлөөгүй гэдэг байр суурийг америкийн засаг захиргаа илэрхийлсэн хэвээр байна. Энэ сарын эхээр хятадын тагнуулын гэгдэх агаарын бөмбөлөг АНУ-ын эх газар руу нэвтэрсэн хэрэг явдлаас үүдэж Блинкен Хятадад хийх гэж байсан айлчлалаа хойшлуулсан. АНУ-ын тал уг бөмбөлгийг тагнуулын зориулалттай гэж үзэн буудаж унагасан юм. Хятад улс харин энэ тухайд дургүйцлээ илэрхийлж, АНУ-ыг мөн агаарын орон зайд нь 10 гаруй удаа "хууль бусаар" өндрийн бөмбөлөг нисгэсэнд буруутгаж байгаа юм.

Энэчлэн харилцаа нь нэлээн таагүй байгаа ч гэлээ АНУ-ын засаг захиргаа Хятадтай яриа хэлэлцээ өрнүүлэхийг чухалчилж, нөхцөл байдал бүрдсэн даруйд тнбд Блинкен Хятадад айлчилна гэж мэдэгддэг. Одоо яригдаж байгаачлан, Блинкен, Ван И нар уулзалдвал АНУ-Хятадын хоорондох тэртэй тэргүй хурцадмал байдлыг улам дэврээсэн агаарын бөмбөлгийн асуудлаас хойш хоёр улсын гадаад бодлогын тэргүүлэх улстөрчид анх удаа нүүр тулан уулзах юм.

Үүний зэрэгцээ Хятадын Гадаад хэргийн сайд асан, одоо ХКН-ын Гадаад хэрэг эрхэлсэн Хорооны дарга Ван И шинэ албанд орсноос хойшхи анхны гадаад айлчлалаа энэ 7 хоногт Орос, Франц, Итали, Унгар улсуудад хийж, Мюнхений аюулгүй байдлын бага хуралд илтгэл тавих юм. Тэрчлэн Ван И-гийн Европ дахь айлчлал, дэлхийн тэргүүлэх том эдийн засагтай АНУ-Хятад хоёр улсын хурцадмал харилцааг улам дэвэргэсэн агаарын бөмбөлөгтэй холбоотой асуудлын дараа Европын орнуудтай харилцаагаа сэргээх хятадын хүчин чармайлтын нэг хэсэг гэж тооцогдож байна.