Турк-Сирийн газар хөдлөлтийн гамшигт өртөж амь үрэгдсэн хүний тоо 42 мянгад дөхөж байна. Газар хөдлөлтөөс хойш 10 хонож байгаа ч эрэн хайх аврах ажиллагаа үргэлжилсээр, цөөн боловч хүмүүсийг эсэн мэнд гаргаж авсан мэдээ ирж байна. Мөн Сирийн босогчдын хяналтан дахь бүсүүдэд тусламж хүргэх ажил удаж байгаатай холбоотой иргэдийн уур хилэн нэмэгдэж, хамгийн их санаа зовоосон бүс болоод байгааг ДЭМБ мэдэгдэж байна. Энэ зуур газар хөдлөлтөд амь эрсэдсэн хүний тоо Туркт 36 200-д дөхөж, Сирид наад зах нь 5800 хүн амиа алдсан нь тогтоогдоод байна.

Одоогийн байдлаар Турк дэх гамшгийн бүсүүдэд 82 улсын 9046 гадаадын иргэд аврах эрэн хайх болон бусад хүмүүнлэгийн үйл ажиллагаанд оролцож байгаа гэдэг мэдээллийг туркийн ГХЯ-наас өгсөн байна. Хамгийн сүүлийн мэдээгээр, газар хөдлөлтөөс хойш 248 дахь цаг дээр буюу 10 дахь хоног дээр туркийн Караманмараш нурсан барилга дороос 18 настай охиныг эсэн мэнд аварчээ. Энэ зуур Сирийн босогчдын хяналтан дахь бүсүүдэд тусламж хүргэхэд гол саад учруулж байгаа хилийн гарц боомт дутмаг байдлыг залруулах хүрээнд шинээр хоёр боомтыг түр нээсэн. Турк-Сирийн хил дээрх уг хоёр боомтыг нөхцөл байдлаас үл хамааран нээлттэй хэвээр байлгахыг үүрэгдсэн тогтоол батлахыг америкийн төрийн департаментын албан ёсны төлөөлөгч Нед Прайс НҮБ-д уриалсан байна.

НҮБ-ын енбд Антонио Гутерреш тухайн хоёр хилийн боомтыг урьдчилсан байдлаар гурван сараар нээх Сирийн ерөнхийлөгч Башар Аль-Асадын шийдвэрт баяр хүргэжээ. Гэхдээ Сирийн төв засгийн газрын үзэл бодол өөрчлөгдөх юмуу өөр ямарваа шалтгаанаар эдгээр боомтууд хаагдахгүй байх нөхцөлийг бүрдүүлэх хамгийн үр дүнтэй арга нь Аюулгүйн зөвлөлийн тогтоол гэж бид үзэж байна гэж Нэд Прайс мэдэгдсэн байна.Тэрчлэн Туркийн газар хөдлөлтөөс хойш Сиричүүд олон зуугаараа нутаг буцаж байгаа тухай хэвлэлүүд мэдээлж байна.

Турк-Сирийн хил дээрх шалган нэвтрүүлэх цэгээр одоогийн байдлаар, 1795 Сиричүүд нутаг буцсан тухай тус хилийн боомтын төлөөлөгч Аль-Жазирад мэдээлжээ. Тэдний дийлэнх олонх нь Сирийн иргэний дайнаас зугтаж Турк рүү дайжсан дүрвэгчид байгаа юм байна. Харин тэднийг хилийн цаана угтаж авч байгаа газар нь Сирийн ерөнхийлөгч Башар аль-Асадын засгийн газартай тэмцэл явуулдаг сөрөг хүчний босогчдын хяналтан дахь бүс нутаг юм.