Францын ерөнхийлөгч Эммануэль Макрон ХКН-ын ТХ-ны гадаад хэрэг эрхэлсэн Хорооны дарга Ван И-г өчигдөр Парис хотноо Елисейн ордонд хүлээн авч уулзсан байна. Энэ үеэр хоёр тал Украинд энх тайван тогтооход хамтын хүчин чармайлт гаргах бодолтой байгаагаа илэрхийлжээ. Макрон мөн энэ үеэр, Бээжинг энхийн яриа хэлэлцээ эхлүүлэхэд Москвад нөлөөлөх чадамжтай гэж итгэж байгаагаа илэрхийлж байжээ.

Гэхдээ Парис, Бээжин хоёр Оросын эхлүүлсэн цэрэг дайны хямралыг дипломатын аргаар хэрхэн зохицуулах тухайд ямар бодолтой байгаа талаар мэдээлэлд дурдаагүй байна. Гагцхүү Хятад улс Франц болон олон улсын хамтын нийгэмлэгийн бусад улстай гал зогсоож, дайныг эцэс болгох үүднээс асуудлыг шийдвэрлэх улстөрийн арга хэрэгслүүдийг судалж үзэхэд бэлэн байгааг Елисейн ордны мэдэгдэлд дурджээ. Хоёр тал Украиныг тойрсон бүхий л асуудлаар санал солилцсон байна. Ван И энэ үеэр, Хятад улс энэ асуудалд ямагт бодитой байхыг чухалчилж, энх тайван тогтооход, мөн яриа хэлэлцээ өрнүүлэхэд тус дөхөм болохыг чармайж байгаа гэдгийг тэмдэглэжээ. Макрон, Ван И нар үүнээс гадна, Орос-Украины дайны “буурай орнуудад үзүүлж байгаа” нөлөө, тэр дундаа хүнсний аюулгүй байдал, санхүүжилтийн боломжууд зэрэг хүрээнд санал солилцжээ. Хоёр улстөрчийн хувьд, “олон улсын эрх зүйн хэм хэмжээг сахин мөрдөж энх тайван тогтоох нийтлэг зорилго”-ыг тус бүрийн улс нь дэмжиж байгааг илэрхийлсэн байна.

Өнгөрсөн оны 11-р сард Хорийн бүлгийн дээд хэмжээний уулзалтын үеэр Эммануэль Макрон Украинд энх тайван тогтоох үйлсэд “зуучлагчийн чухал үүрэг” гүйцэтгэхийг Хятадын дарга Ши Жинпиньд уриалж байсан байдаг. Ван И Парист мөн, Францын гадаад хэргийн сайд Катрин Колоннатай уулзсан байна. Энэ үеэр Бээжин Хятадаас зай барьж хөндийрөхгүй байхыг Францад зөвлөхийн зэрэгцээ техникийн хамтын ажиллагаагаа идэвхжүүлж, хятадын чип үйлдвэрлэлд АНУ хориг тавьсантай холбогдуулж хятадын бизнесийг шударга нөхцлөөр хангахыг мөн уриалжээ. Хятадын тэргүүн дипломатчийн Европын орнууд дахь айлчлалын эхний улс нь Франц юм. Эндээсээ тэрээр Итали, Унгар, Орост айлчлал хийгээд Германд хүрэлцэн очих төлөвлөгөөтэй байгаа юм. Хятадын Өрнөдтэй харилцах харилцаа төдийлөн сайнгүй байгаа үед энэ айлчлал болж байгаа.

Бээжин одоогоос жилийн өмнө ОХУ-ын Украинд эхлүүлсэн түрэмгийллийг илтэд зэмлэн буруутгадаггүй, бас Оросын эсрэг бусад улсын хоригт нэгдэхээс татгалздаг зэрэг нь байдлыг улам хүндрүүлж, Хятадын Европын дийлэнх улстай харилцах харилцааг сэвтээх хандлагатай болоод байгаа юм.