Энэ жилийн Мюнхений аюулгүй байдлын бага хуралдаан энэ сарын 17-оос 19-ны өдрүүдэд ХБНГУ-д болж байна. Тус хуралдаанд Европын 30-аад орны тэргүүн болон АНУ, Япон, БНХАУ-ын өндөр албан тушаалтнууд оролцож, трансатлантын бүс нутгийн аюулгүй байдал, хамтын ажиллагааны хүрээнд яриа хэлэлцээ үргэлжилж байна. 1960 оноос хойш жил бүр зохиогдож байгаа Мюнхений аюулгүй байдлын бага хуралдаанаар дэлхий дахинд тулгамдаад буй аюулгүй байдлын асуудлыг авч хэлэлцдэг уламжлалтай.

Энэ удаагийн хуралдаанаар ОХУ-Украины дайныг голчлон хэлэлцэж байна. Дайн эхлээд нэг жилийн нүүрийг үзэж буй энэ өдрүүдэд Мюнхений бага хуралдаанд оролцогчид Украинд үргэлжлүүлэн дэмжлэг үзүүлж, хуваарилсан танк зэвсэг, техникүүдээ яаравчлан хүргэх тал дээр анхаарч байгаагаа илэрхийллээ. Тухайлбал ХБНГУ-ын Канцлер Олаф Шольц тун удахгүй анхны Леопард танкуудаа Украинд аваачих болно гэж мэдэгдлээ. Мөн тэрээр урт хугацааны дайнд бэлдэх нь зүйтэй бөгөөд бидний холбоотнууд Украиныг няцалгүйгээр дэмжинэ гэдгийг харуулах нь зүйтэй гэж хэлжээ.

ХБНГУ 1-р сард Леопард байлдааны танкуудыг нийлүүлэх эсэх дээр эргэлзэж байсан ч эцэст нь зөвшөөрснөөс гадна бусад улс орнуудыг ч Леопард 2 загварын танкуудыг Украинд нийлүүлэхийг дэмжиж шийдвэрлэсэн. Харин Францын ерөнхийлөгч Эммануэль Макрон ОХУ-тай Украиныг эзлэн түрэмгийлсэн асуудлаар яриа хэлэлцээ хийх цаг үе нь одоо биш гэж мэдэгдээд ойрын өдрүүдэд илүү шийдэмгий байж, Украиныг сөрөг довтолгоонд бэлдэхийн тулд холбоотнууд " дэмжлэгээ эрчимжүүлэх" шаардлагатай байгааг онцлон тэмдэглэжээ.

Харин Украины ерөнхийлөгч Зеленский бага хуралдаанд онлайнаар холбогдон өрнөдийн холбоотнуудыг зэвсгийн нийлүүлэлтээ яаравчлахыг уриалж, хангалттай байлдааны танкуудтай болсноор газар нутгаа эргүүлэн авахад дөхөм болно гэж хэлсэн байна. Энэ жилийн хуралдаанд Европын орны тэргүүн нараас гадна Японы Гадаад хэргийн сайд Хаяши Ёшимаса, Хятадын гадаад бодлогын дээд албан тушаалтан Ван И, АНУ-ын дэд ерөнхийлөгч Камала Харрис, Төрийн нарийн бичгийн дарга Энтони Блинкен нар оролцож байна. Харин хуралдааны гол сэдэв болж буй ОХУ-ын төлөөлөгчдийг энэ удаагийн хуралдаанд урьсангүй гэдгийг хэвлэлүүд онцолжээ.