ОХУ-ын ерөнхийлөгч Владимир Путин АНУтай байгуулсан стратегийн давшилтын зэвсэг хорогдуулах гэрээгээр хүлээсэн үүргээсээ түр түдгэлзэх тухай хуулинд гарын үсэг зуржээ. Ингэснээр ОХУ өөрийн нөөцөд байгаа цөмийн цэнэгт хошуу, цөмийн зэвсэг тээх чадалтай пуужин болон бөмбөгдөгч онгоцны тоог хязгаарлах эрх зүйн зохицуулалт түр зогсож байна. Гэхдээ шинжээчид ойрын хугацаандаа нэг их ноцтой түвшинд хүрэхгүй, харин урт хугацаандаа хоёр тал ойлголцохгүй, Москва гэрээнээс бүр мөсөн гарахад хүрвэл аль аль нь стратегийн зэвсгийн нөөцөө нэмэгдүүлэхэд хүргэж магадгүй гэж үзэж байна.

Москва энэхүү гэрээнд гарын үсэг зурахад нөлөөлсөн геополитикийн бодит байдал өнөөдөр өөрчлөгдсөн. Гэрээ одоо бол Америкийн талд ашигтай болсон, Америк НАТО хоёр Украиныг дэмжиж, Оросыг сүйрүүлэхийг эргэлзэж байгаа шалтгаанаар түр гарч байгаагаа тайлбарласан. Гэхдээ Орос гэрээнээс бүр мөсөн гарахгүй гэдгээ ч илэрхийлсэн. Дэлхийн хэмжээнд 12700гаруй цөмийн цэнэгт хошуу байдгаас 5977 нь Оросд, 5428 нв Америк эзэмдэг. Өөрөөр хэлбэл дэлхийн нийт цөмийн цэнэгт хошууны 90орчим хувийг хуваан эзэмшдэг Орос, Америкийн хооронд цөмийн зэвсэгт хяналт тавьдаг цорын ганц гэрээ нь Стратегийн зэвсэг хорогдуулах тухай энэ гэрээ юм. Орос, Америкийн аль алийнх нь байршуулах боломжтой цөмийн цэнэгт хошууны тоог хязгаарлаж байсан энэхүү гэрээнд АНУ-ын ерөнхийлөгч асан Обама, Оросын тухайн үеийн ерөнхийлөгч Дмитрий Медведев нар 2010онд гарын үсэг зурж байсан. Уг гэрээ 2011оноо хүчин төгөлдөр болж, 2021ронд Байденыг тангараг өргөсний дараахан 5жилээр сунгасан юм.

Гэрээний хугацаа 2026онд дуусна. Энэ гэрээгээр Москва, Вашингтон хоёр цөмийн цэнэгт хошуу 1550, холын тусгалт пуужин болон бөмбөгдөгч онгоц 700, тив алгасагч баллистик пуужин 800-гаас дээш тоогоор байрлуулахгүй байхаар амлалт авсан. Мөн хоёр тал стратегийн цөмийн зэвсэг байршуулсан газруудад жилд 18 хүртэлх удаа шалгалт хийж, нөгөө тал гэрээний хязгаарлалтыг зөрчөөгүй эсэхийг баталгаажуулах үүрэг хүлээсэн байдаг. АНУ Оросын энэ алхам туйлын хариуцлагагүй, үүнд харамсаж байна. Орос дангаараа гэрээнээс түр түдгэлзчихээр яг амьдрал дээр яаж нөлөөлөхийг урьдчилж хэлэх боломжгүй, Москва ингэж стратегийн байр сууриа өөрчлөх ямар ч шалтгаан олж харахгүй байна гэж мэдэгдсэн.

НАТО мөн Оросын энэ шийдвэрт харамсаж байгаагаа илэрхийлсэн. Хятад улс энэ гэрээг дэлхийн стратегийн тогтвортой байдлыг хангахад чухал ач холбогдолтой гэрээ учир гэрээг хоёр тал аль аль нь дагаж мөрдөхийг уриалсан. Харин шинжээчид Украины дайны үйл явцаас шалтгаалж Орос стратегийн зэвсгийн нөөцийнхөө талаар илүү нарийн мэдээллээ алдахгүйн тулд гэрээнээс түр түдгэлзлээ гэж үзэж байна.