Финландын парламент улсаа НАТО-д элсүүлэх хүсэлтийг дийлэнх олонхын саналаар батламжилсан байна. НАТО-д гишүүнчлэх тухай хуулийг батлахыг тус улсын парламентын 200 депутатын 184 нь дэмжиж, 4 депутат эсэргүүцэж, 1 депутат түдгэлзсэн санал өгчээ.

Умард Атлантын батлан хамгаалах эвсэлд шинэ гишүүд элсүүлэхэд энэ эвслийн бүх гишүүн улсын дэмжлэг шаардлагатай байдаг. Финландын хүсэлтийг одоогийн байдлаар, энэ эвслийн гишүүн орнуудаас Турк, Унгар хоёр улс батламжлаагүй байгаа. НАТО-гийн суурь баримт бичгүүдийг баталснаар Финланд улс хамт өргөдөл гаргасан, хөрш улс Шведээс давуу байдалтай болно. Шведийн тухайд мөн НАТО-д элсэх хүсэлт гаргасан боловч Туркийн талаас асуудлыг саатуулж байгаа юм.

Туркийн ерөнхийлөгч Рэжеп Таип Эрдоган Финландыг НАТО-д элсүүлэхийг улс нь дэмжихэд бэлэн гэдэг байр суурийг өмнө илэрхийлсэн. Харин Шведийн тухайд, террорист байгууллагуудын гишүүд гэж тооцогддог хүмүүсийг орогнуулж байгаад Анкара тус улсыг буруутгаж байгаа юм. НАТО-гийн ерөнхий нарийн бичгийн дарга Иенс Столтенберг өнгөрөгч 7 хоногт хийсэн мэдэгдэлдээ, Скандинавын хойгийн энэ хоёр улс хоёулаа ирэх 7 дугаар сард болох эвслийн дээд хэмжээний уулзалтаар гишүүнчлэлээ авч чадна гэж үзэж байгаагаа илэрхийлсэн байна.

Швед, Финланд хоёр улс өнгөрсөн оны 2 дугаар сард Оросын цэрэг Украинд түрж орсон хэрэг явдлаас үүдэж НАТО-д гишүүнчлэх асуудлыг анх тавьж, улмаар 5 дугаар сард албан ёсоор хүсэлтээ гаргасан юм. Үүний зэрэгцээ Финланд улс ОХУ-тай залгаа хилийн дагуух аюулгүй байдлаа нэмэгдүүлэх хүрээнд хашилт хаалт босгож эхэлсэн байна. Финланд Оростой 1300 км урт хилийн шугамаар холбогддог юм байна. Тус улсын хилийн хамгаалалтын албанаас мэдээлснээр, 3 метр өндөр хаалтыг хилээс 200-км зайд босгох ажил 2 өдрийн өмнөөс эхэлсэн, ирэх 6 дугаар сард багтаан дуусгахаар төлөвлөжээ.

Өнгөрсөн оны 9 сард ОХУ-д хэсэгчилсэн цэрэг татлага явагдаж эхэлснээс хойших хугацаанд оросын иргэд олноор Финландын хилийг давж нэвтэрсэн байна. Энэ мэт дайчилгаанаас зугтаж байгаа оросын иргэд хилээр нь олноороо хууль бусаар нэвтэрч байгаа асуудлыг Финландын засгийн газар анхааралдаа авчээ.