Грек улсад өнгөрсөн долоо хоногт галт тэрэгний ослын улмаас 57 хүн амиа алдсан. Тиймээс тус улсын төмөр замын цахим хяналтын системийг шинэчлэх ажлыг яаралтай дуусгахад бүхий л хүчин чармайлтаа гаргана гэж  Ерөнхий сайд Кириакос Мицотакис мэдэгджээ.

Галт тэрэгний осол хоёрдугаар сарын 28-нд Грекийн хойд хэсгийн Темпе хотын ойролцоо болсон юм. Суудлын галт тэрэг эсрэг чиглэлээс ирж байсан ачаа тээврийн галт тэрэгтэй мөргөлдсөний улмаас замаас гарч, гал гарсан байна.

Хэрвээ цахим хяналтын системийн шинэчлэл дууссан байсан бол ийм осол гарах бараг боломжгүй байсан" гэж Ерөнхий сайд хэлээд, галт тэрэгнүүд аль болох хурдан, аюулгүй байдлыг дээд зэргээр ханган үйл ажиллагаагаа эхлэх шаардлагатай байна гэдгийг онцолжээ.

Осолдсон галт тэрэгнүүдийг нэг зам дээр байрлуулсан гэж буруутгагдаж байсан станцын даргыг санамсаргүйгээр хүн амины хэрэг үйлдсэн гэх зүйл заалтаар хэрэгт татсан байна.

Мөн бусад хариуцлага тулган, осол болсны маргааш нь тус улсын Зам тээврийн сайд болон төмөр замын удирдах албан тушаалтнуудыг огцруулжээ.

Ерөнхий сайдын хэлснээр одоо ээлж бүрт хоёр өртөөний дарга нэмж, төмөр замын сүлжээнд хохирол учруулах, хулгайд өртөх зэрэгтэй холбоотой хууль эрх зүйн зохицуулалтыг мөн чангатгахаар болжээ.

Грекийн төмөр зам удаан хугацааны туршид буруу менежментийн улмаас шалтгаалж байнга асуудал дагуулдаг байна. Тэр дундаа шинэчлэлийн төслүүдэд асар их зардал төсөвлөдөг ч эцэст нь ажил орхигдох, эсвэл ихээхэн хугацаагаар хойшлох гэх зэрэг асуудал гардаг талаар Грекийн хэвлэл мэдээллийн хэрэгслүүд хэд хэдэн удаа мэдээлж байжээ.

Мөн төрийн мэдлийн төмөр замын компани "Hellenic Railways" олон тэрбум еврогийн өрөнд унасан тул засвар үйлчилгээний ажлыг хойшлуулсаар ирсэн гэж мэдээлж байжээ.