Финланд улс НАТО-д албан ёсоор элслээ. Ингэснээр Скандинавын хойгийн энэ улс аюулгүй байдлын энэ эвслийн 31 дэх гишүүн нь болж, мөн анхны хуралдаанд нь оролцсон байна. НАТО-гийн енбд Иенс Столтенберг Брюссель дэх НАТО-гийн төв байрнаа Финландын ерөнхийлөгч Саули Ниинистё-гийн хамтаар тус улсын гишүүнчлэлийг зарласан байна.

Тэрээр “өнөөдрөөс, бидний нэгдмэл байдал, эв санааны бэлгэдэл болсон 31 далбаа намирах болж байна. Финланд улс НАТО-д элссэний ач тусыг хүртэх болно. Скандинавын хойгийн аюулгүй байдал төдийгүй НАТО эвсэлд ч ач тустай үйл явдал болж байна” гэж мэдэгджээ. 1949 оны 4-р сарын 4-ний өдөр байгуулагдаж байсан Умард Атлантын цэрэг батлан хамгаалах эвсэл байгуулагдсаныхаа 74 жилийнхээ ойн дээр ийнхүү Финланд улсыг эгнээндээ нэгтгэж байна. Мөн хэдэн арван жилээр цэргийн аливаа эвсэлд нэгдэхээс татгалзаж ирсэн Финланд улсын төвийг сахигч орны статус энэ мөчөөс төгсгөл болж байна. Финланд НАТО-гийн гишүүн болсны дараах эвслийн анхны хуралдаанд Финландын Гадаад хэргийн сайд Пекка Хаависто оролцжээ. ОХУ-тай 1340 км урт хилээр холбогддог энэ улс НАТО-д элссэнээр мөн ОХУ-ын НАТО-той хиллэдэг хилийн урт хоёр дахин уртасч байна. Өнгөрсөн оны 2-р сард Орос Украинд халдан довтолсны дараагаас Хельсинк төвийг сахигч орны байр сууриа эргэн харж, улмаар тавдугаар сард хөрш Швед улсын хамтаар НАТО-д элсэх хүсэлтээ гаргасан байдаг. ОХУ-ын ерөнхийлөгч Владимир Путин Умард Атлантын эвслийг тэлж өргөжихийг хэзээнээс эсэргүүцэж ирсэн.

Тиймээс НАТО-гийн энэхүү тэлэлт ОХУ-д стратегийн цохилт боллоо гэж өрнөдийн хэвлэлүүд цохон тэмдэглэж байна. Путины хэвлэлийн төлөөлөгч Финландыг НАТО-д элссэний хариуд ОХУ сөрөг арга хэмжээ авахаас аргагүйд хүрч байна, өөрийн улсын аюулгүй байдлыг хангах үүднээс тактикийн болоод стратегийн хүрээнд сөрөх арга хэмжээ авах болно гэж мэдэгджээ. Үүний зэрэгцээ Скандинавын хойгийн дараагийн улс Швед хэзээ НАТО-д элсэх нь асуултын тэмдэгтэй хэвээр байгааг ажиглагчид тэмдэглэж байна. НАТО-гийн гишүүн Унгар, Турк улсууд Стокхолмын хүсэлтийг саатуулсан хэвээр байгаа билээ.