Японы төв банкны шинээр томилогдсон ерөнхийлөгч даваа гарагт мэдэгдэл хийж тус улсад хэрэгждэг маш бага хүүтэй бодлогод төдийлөн өөрчлөлт хийхгүй гэдгээ мэдэгджээ. Тэрээр Японы санхүүгийн байгууллагууд сүүлийн үед АНУ-д болон Европд банкууд дампуурсантай адил эдийн засгийн хямрал Японд тулгараагүй байна гэдгийг мөн онцолжээ.

Тэрээр дэлхийн гурав дахь том эдийн засагт үнэ болон санхүүгийн системийн тогтвортой байдлыг хадгалахын тулд чадах бүхнээ хийхээ амласан. Түүнчлэн инфляцын түвшинг 2 хувьд тогтвортой барихаар ажиллахаа мэдэгдлээ. Дэлхий дахинд инфляцын дарамт эрсдэлтэй хэвээр байгаа бөгөөд Төв банкууд эдийн засгийн идэвхжилийг сааруулах зорилготой их хэмжээний хүүгийн өсөлттэй тэмцэж байгаа энэ цаг үед Японы төв банк сүүлийн арван жилийн хугацаанд анх удаа удирдлагаа ийнхүү солилоо гэж олон улсын хэвлэлүүд мэдээлжээ.

Өнгөрсөн Ням гарагт албан тушаалаа хүлээн авсан Уэда хоёр дахь таван жилийн хугацаа нь өнгөрсөн амралтын өдрөөр дуусгавар болсон өмнөх Ерөнхийлөгч Харухико Куродагийн дуусгаагүй олон ажил хэргийг үргэлжлүүлэх болов уу гэж олон нийт хүлээлттэй байна.

Курода эдийн засгийн идэвхжилийг нэмэгдүүлэхийн тулд хүүг тэг эсвэл хасахад барихад чиглэсэн арав гаруй жилийн хугацаатай мөнгөний хөтөлбөрийг баримталж иржээ. Японы жишиг хүү олон жилийн турш хасах 0.1%-д тогтвортой байсаар ирсэн юм.

Зээлийн хүүг бага байлгаснаар банкууд болон хэрэглэгчдийг илүү их мөнгө зарцуулахыг дэмжиж, эдийн засгийн өсөлтийг түргэтгэх зорилготой юм байна. Шинээр томилогдож байгаа төв банкны удирдлага нь үүнээс өмнө тус банкны бодлогын зөвлөлийн гишүүнээр ажиллаж байсан бөгөөд одоо банкны ерөнхийлөгчөөр 5 жилийн хугацаанд ажиллахаар томилогдлоо.