АНУ болон Филиппиний гадаад хэрэг, батлан хамгаалахын сайд нарын 2+2 уулзалт Вашингтон хотноо боллоо. Хоёр тал Энэтхэг, Номхон далайн бүс нутагт энх тайван байдлыг хангах, аюулгүй байдлаа хамгаалахад нэг зорилготой байгаагаа нотолж, энэ чиглэлд түншлэлээ улам гүнзгийрүүлэхээр тохирсон байна.

Бид хамтын ажиллагааны шинэ чиглэлүүдээ судалж, харилцан батлан хамгаалах, далай тэнгисийн аюулгүй байдал, тагнуулын мэдээлэл солилцох зэрэг салбарт одоогийн түншлэлээ улам гүнзгийрүүлэхээр тохирлоо гэж Филиппиний батлан хамгаалахын сайд онцолжээ. Холбоотон орнууд ирээдүйн хямралд бэлтгэлтэй байх үүднээс ирэх 5-10жилд хэрэгжүүлэх замын зураглалаа гаргах юм байна. Вашингтон, Манила хоёр Америкийн цэрэг Филиппиний цэргийн таван баазыг ашиглах асуудлаар аль хэдийн тохиролцоонд хүрсэн.

Өнөөдрийн байдлаар Америк, Филиппиний армийн бие бүрэлдэхүүнд харилцааны түүхэндээ хамгийн том хамтарсан сургуулилалтыг хийж байна. Ирэх гурван 7 хоногийн хугацаанд 17 мянга гаруй цэрэг хамтарсан сургуулилалтад оролцох юм байна. Тэдгээр цэргийн зарим нь Өмнөд Хятадын тэнгист Филиппиний хуучин хөлөг онгоцыг живүүлэх байлдааны буудлагатай сургуулилалтад анх удаа оролцох юм. Филиппиний зарим иргэд энэ сургуулилалт нөхцөл байдлыг улам хурцатгах вий гэж болгоомжилж, Манила хот дахь Америкийн ЭСЯ-ны гадаа жагсаал хийжээ. Хятадын эрх баригчид энэ сургуулилалт бүс нутгийн энх тайван тогтвортой байдалд аюул учруулж байна гэж Америкийн талд эсэргүүцлээ илэрхийлээд байна. Америк Филиппин улсууд 1951 онд батлан хамгаалах хамтын ажиллагааны гэрээ байгуулснаар холбоотны харилцаа тогтоосон. Одоогоор Филиппинд Америкийн 500 орчим цэрэг байрладаг юм байна.