Төрөлт буурсантай холбогдуулан Өмнөд Солонгосын засгийн газар анхны хүүхдээ өлгийдөн авсан шинэ эцэг эхэд олгох тэтгэмжийн хэмжээг ирэх оноос жилд 10 мянган америк доллар болгон нэмэгдүүлэх юм байна. Одоогоор Өмнөд Солонгост нэгээс доош насны нярай хүүхэдтэй гэр бүлд сард 528 ам.доллар, 2 хүртлэх насны хүүхэдтэй гэр бүлд сард 264 ам.долларын тэтгэмж өгдөг. 2024 онд энэхүү тэтгэмжийг сард 377-гоос 755 ам.доллар болгон тус тус нэмэгдүүлэхээр болжээ.

2022 оноос эхлэн Өмнөд Солонгост эхчүүд хүүхэд төрүүлснийхээ дараа 2 сая воны тэтгэмж бэлнээр авч байгаа нь нийгмийн халамж сайтай Францаас ч өндөр дүнтэйд тооцогдож байна. Мөн хүүхэд бүрт сар бүр олгож байгаа 200 мянган воныг тухайн хүүхдийг бага сургуульд орох хүртэл олгох бол бага орлоготой өрх болон өрх толгойлсон эцэг эхэд нэмэлт тэтгэмж олгох юм байна. Түүнчлэн жирэмсэн эхийн эмчилгээний зардал, үргүйдлийн эмчилгээ, хүүхэд асрах үйлчилгээ, хосын болзооны зардалд хүртэл тэтгэмж олгохоор болжээ.

Мөн Орон нутгуудад тэтгэмж өсжээ. Тухайлбал Бусанд 3 ба түүнээс дээш хүүхэд төрүүлсэн эхэд тусад нь олгодог тэтгэмж 500 мянган воноос 10 сая вон болж нэмэгджээ. Харин залуу гэр бүлд засгийн газрын тэтгэмж тус дэм болж байгаа хэдий ч зөвхөн мөнгөөр нийгмийн асуудлыг шийдэж чадахгүй гэж мэргэжилтнүүд нь үзэж байна. 2022 онд тус улсын нэг эмэгтэйд ногдох хүүхдийн дундаж тоо 0,78 болж буурч, хамгийн доод үзүүлэлт харуулсан. Өндөр хөгжилтэй орнуудад хүн амыг тогтвортой байлгахад шаардлагатай төрөлтийн дундаж тоо гол төлөв 2,1 байдаг юм байна.

Энэ байдлыг өөрчлөхийн тулд Өмнөд Солонгосын төв засгийн газар болон орон нутгийн засаг захиргаа хүүхэд төрүүлсэн хүн бүрт мөнгөн тэтгэмж болон бусад дэмжлэг үзүүлэхээр чармайж байна. Буурай орноос өндөр хөгжилтэй улс болтлоо өссөн Өмнөд Солонгос нийгмийн хамгаалал сайтай биш, нийгмийн зардлаараа Эдийн засгийн хамтын ажиллагаа, хөгжлийн байгууллага дундаа хамгийн бага үзүүлэлттэй байдаг. Өмнөд Солонгосын нийгэмд гэрлэхгүй, хүүхэд төрүүлэхгүй байх нь хувь хүний эрхийн асуудал болжээ. 19-34 насны эмэгтэйчүүдийн дунд явуулсан судалгаагаар 36,7 хувь нь хүүхэд төрүүлэх хүсэлгүй гэж хариулсан байна.

2022 онд тус улсад дөнгөж 192 мянган гэрлэлт бүртгэгдсэн нь урьд өмнө байгаагүй бага үзүүлэлт болсон. Энэ байдлыг өөрчлөхөд ажлын байрны хатуу соёл, өндөр үнэтэй орон байр, боловсролын зардал, жендерийн тэгш бус байдал зэрэг олон зүйлд анхаарах шаардлагатай гэж мэргэжилтнүүд нь үзэж байна. Тус улс өмнөх 16 жилд төрөлт, гэрлэлтийг нэмэгдүүлэхэд 211 тэрбум доллар зарцуулсан нь үр дүнгээ өгөөгүй, иймд илүү нарийн бодлого явуулна гэж ерөнхийлөгч нь мэдэгджээ.