Оросын ерөнхийлөгч Владимир Путин өчигдөр хятадын БХЯ-ны сайдыг хүлээн авч уулзсан байна. Энэ үеэрээ Путин, АНУ болоод өрнөдийн бусад томоохон гүрнүүдийн нөлөөг бууруулах хүчин чармайлтын хүрээнд гадаад бодлогоо мэдэгдэхүйц уялдуулах тохироотой Бээжингийн Москватай бэхжүүлж байгаа холбоо харилцааг онцлон тэмдэглэж байжээ.

Хятадын дарга Ши Жиньпиний Москвад хийсэн хоёр өдрийн айлчлалаас хойш сар хүрэхгүй хугацааны дотор Путин болон оросын батлан хамгаалахын сайд Сергей Шойгу нар Хятадын батлан хамгаалахын сайд, генерал Ли Шанфуг хүлээн авч уулзаж байгаа нь энэ юм байна. Хятад улс Оросын Украинд явуулж байгаа цэрэг дайны ажиллагааг илтээр шүүмжилдэггүйн дээр АНУ болон НАТО-г Москваг өдөөн хатгасанд буруутгадаг. Гэхдээ Хятад улс Орост зэвсгээр туслахгүй гэдгийг хятадын Гадаад хэргийн яам өнгөрсөн 7 хоногт мэдэгдсэн. АНУ болон түүний холбоотнууд үүнээс ихээхэн болгоомжилж байсан. Украины хямралд Хятад улс албан ёсоор төвийг сахисан байр суурь баримталсан хэвээрээ. Гэхдээ Ши Жиньпиний Орост хийсэн айлчлал, Украины дайны нөхцөлд Орост эдийн засгаар тусалж, улс төрийн халхавч болж өгч байгаа гэдгээрээ харилцаанд давамгайлах байр сууриа баталсан хэрэг болсон гэж ажиглагчид мөн дүгнэдэг. Путин Хятадын сайдыг хүлээн авч уулзах үеэрээ, орос-хятадын харилцааны ерөнхий хөгжлийг өндрөөр үнэлж, “батлан хамгаалах яамд хоорондоо идэвхтэй хамтран ажиллаж, чухал мэдээллүүд солилцож, цэрэг-техникийн салбарт хамтрахын зэрэгцээ, Алс Дорнод, Европын бүсэд болон ус, агаар, хуурай газарт гээд олон талбарт хамтарсан цэргийн сургуулилалт явуулж байна” гэж ярьжээ.

Хятадын сайд харин, хоёр орны харилцаа “хүйтэн дайны үеийн цэрэг-улс төрийн холбооноос давсныг” тэмдэглэж, “үл нэгдэх зарчимд суурилсан, маш тогтвортой харилцаа” гэдгийг онцлохын хамтаар орос-хятадын харилцаа хэдийнэ шинэ үедээ орсон гэдгийг оросын тв-д ярилцлага өгөх үедээ дурдаж байжээ. Хятадын БХЯ-ны сайд өчигдрөөс эхэлж, лхагва гарагийг дуустал үргэлжлэх айлчлалынхаа хүрээнд оросын өндөр тушаалын цэргийнхэнтэй хэлэлцээ хийхээс гадна цэргийн академид зочлохоор төлөвлөжээ.