БНХАУ-ын батлан хамгаалахын сайд Ли Шангфу Ши Жиньпин даргын дараа сар хүрэхгүй хугацааны дотор Москвад ажлын айлчлал хийж байна. Тэрээр айлчлалын эхэнд ОХУ-ын ерөнхийлөгчид бараалхаж, хоёр орны харилцаа шинэ эрин үед шилжсэнийг цохон тэмдэглэжээ. Бээжинг Украины дайныг зогсооход Оросд нөлөөлөхийг Өрнөдөөс шахаж шаардаж байгаа үед Хятадын батлан хамгаалахын сайд Москвад очино гэдэг ОХУ-тай цэрэг армийн хамтын ажиллаагаа бэхжүүлж байгаагийн илрэл гэж зарим хэвлэлд онцолжээ.

Энэ сарын 17-19-ны хооронд үргэлжлэх энэхүү айлчлал нь Ли Шангфугийн өнгөрсөн сард Хятадын батлан хамгаалахын сайдаар томилогдсоноосоо хойш гадаад улсад хийж байгаа анхны айлчлал юм. Тэрээр Оросын төрийн тэргүүнтэй уулзахдаа хоёр орны харилцааны онцгой шинж чанар, стратегийн ач холбогдлын үүднээс анхны гадаад айлчлалаа Оросоос эхлүүлж байгаагаа тэмдэглэжээ. Мөн цаашид хоёр орны батлан хамгаалах яамдын стратегийн харилцаа холбоог бэхжүүлэхэд бэлэн байгаагаа мэдэгджээ. Оросын тал ч тогтмол чухал мэдээллээ солилцож, цэргийн технологийн талбарт хамтран ажиллаж, хамтарсан сургуулилалтууд хийх зэргээр батлан хамгаалах яамд хооронд идэвхтэй хамтран ажиллаж байгааг тэмдэглэжээ. Хятад улс Оросыг Украинд дайн хийж байгааг нь шүүмжлэхээс зайлсхийж, Москваг өдөөж байна гэж АНУ болон НАТОг буруутгаж байгаа юм. Түүнчлэн Украины дайнд төвийг сахих дүр төрх харуулж байгаа ч Вашингтон Москвад зэр зэвсэг нийлүүллээ гэж Бээжинг буруутгаж байгаа юм.

Харин Хятадын гадаад хэргийн сайд өнгөрсөн баасан гарагт Украины дайны аль ч талд зэвсэг нийлүүлэхгүй гэдгээ мэдэгдсэн нь Өрнөдийнхний сэжиг таамагт өгсөн хариул боллоо гэж шинжээчид үзэж байна. Хятадын батлан хамгаалахын сайд Лигийн хувьд Оросын зэвсгийн гол экспортлогчоос байлдааны онгоц болон түүний эд анги худалдан авсан үндэслэлээр 2018 оноос хойш АНУ-ын хоригт байгаа юм.