Оросын хүчнийхэн Украины зүүн талын Донецк орчим дахь Бахмут хотыг хяналтдаа авах чиглэлд дайралтаа төвлөрүүлжээ. Ингэхдээ пуужин, нисгэгчгүй онгоцууд ашигласан агаарын дайралтуудаа үргэлжлүүлж байгаа юм байна.

Донецк дахь “дайралтын отрядууд нь өмнөх нэг хоногт хотын баруун талын гурван хорооллыг чөлөөлсөн” талаар Оросын батлан хамгаалах яам бямба гарагт мэдээлсэн байна. “Агаарын десантын цэргүүд дайсныг жигүүрт нь хааж, хотын хяналтдаа авахаар дайрч байгаа довтолгооны отрядуудад дэмжлэг үзүүлж байна” гэж мэдээлэл мөн дурджээ. Оросын цэргүүд зүүн Бахмутыг хэдийн хяналтдаа авсан гэж мэдээлж байна. Оросын Вагнерийн” хүчний цэргүүд Бахмут хотын төв дэх төмөр замын өртөөг эзэлсэн байх магадлалтай байгааг АНУ-ын Дайны судалгааны хүрээлэн баасан гарагт мэдээлсэн байна. Энэ зуур Украины Зэвсэгт хүчний ерөнхий штаб бямба гаригт хийсэн мэдээллээр бол, Оросын арми хоногийн туршид гурван удаа пуужингаар дайрч, 30 удаа агаараас цохилт өгчээ.

Мөн "Украины нийт нутгийн хэмжээнд Оросын пуужингийн болон агаарын дайралт үргэлжлэх магадлал өндөр хэвээр байгааг" дурдсан байна. Америкийн дайны судалгааны хүрээлэнгийн баасан гарагт нийтлүүлсэн мэдээлэлд мөн, "Оросын хүчнийхний Украинд гурав дахь хоногтоо үргэлжлүүлж байгаа агаарын дайралтдаа шинээр нийлүүлэгдсэн “Шахед” нисгэгчгүй онгоцууд ашиглахын сацуу сүүлийн25 хоногт анх удаа Киев руу дайралт үйлдсэн” талаар дурджээ. Оросын агаарын десантын хүчний Украин дахь довтолгоо ийн үргэлжилж байгаа үед АНУ болон европын орнуудын төлөөлөгчид баасан гарагт Германд уулзалдсан байна. Тэд Украины агаарын довтолгооноос хамгаалах чадавхыг сайжруулахад туслах чиглэлд хамтран ажиллахаар тохирчээ. Өмнө нь лхагва гарагт Украины засгийн газар АНУ, Нидерланд, Герман улсуудаас “Патриот” пуужингийн систем хүлээн авснаа зарласан. Украины Агаарын цэргийн хүчний хэвлэлийн төлөөлөгч бямба гарагт мэдэгдэхдээ, "Украины зэвсэгт хүчин одооноос оросын онгоцуудыг хилээсээ чамгүй зайтай байлгах боломж бүрдэж байна" гэж ярьжээ. Мөн АНУ хараахан нийлүүлэхээр зөвшөөрөөгүй байгаа Эф-16 сөнөөгч онгоцуудтай болох нөхцөлд улсынх нь агаараас хамгаалах систем улам ч хүчтэй болно гэдгийг тэр төлөөлөгч мөн дурдаж байжээ.