Дэлхий даяар 2022 онд зэвсэглэлд зарцуулсан хөрөнгийн хэмжээ 3.7 хувиар өсөж, 2.24 их наяд ам.доллар болжээ. Европт энэ үзүүлэлт сүүлийн 30 жилийн хамгийн өндөр өсөлттэй гарсныг Стокхолмын Энх тайвны судалгааны олон улсын хүрээлэнгийн өнөөдөр нийтлэгдсэн илтгэл харууллаа.

Цэрэг дайны зардал хамгийн өндөртэй улсуудыг АНУ, Хятад, Орос гурав тэргүүлж байна. Энэ гурван улс хамтдаа, дэлхийн нийт зардлын 56 хувийг бүрдүүлжээ. Найм дахь жилээ дараалан өссөн дүнтэй гарч байгаа энэ үзүүлэлтийг 2022 онд ийм өндөр өсөхөд нөлөөлсөн гол хүчин зүйлсэд Украины байдал, Зүүн Азийн түгшүүртэй байдал орж байна. Европт харин цэрэг зэвсэглэлийн зардал 13 хувиар ихэсжээ. Энэ нь үндсэндээ Орос, Украины хямралтай гол холбогдож байна. Түүнээс гадна Украинд үзүүлж байгаа тусламж болон ОХУ-ын зүгээс учирч болзошгүй аюул өсөн нэмэгдсэн гэх болгоомжлол нь улс орнуудыг цэрэг зэвсгийн төсвөө нэмэгдүүлэх чиглэлд эргэн харах шалтгаан болж байгааг илтгэлд мөн дурдсан байна. “Сүүлийн жилүүдэд дэлхий даяар ийнхүү цэргийн зардал өсөн нэмэгдэх байдал үргэлжилж байгаа нь бид бүхэн улам бүр найдвар муутай дэлхийд амьдарч байгааг илтгэж байгаа хэрэг юм. Аюулгүй байдлын салбарт нөхцөл муудаж, ойрын төсөрт сайжрах төлөв харагдахгүй нөхцөлд улс орнууд цэргийн хүчин чадлаа өсгөж бэхжүүлдэг” гэж Стокхолмын Энхийн судалгааны олон улсын хүрээлэнгийн зэвсгийн үйлдвэрлэл, зардлын хөтөлбөр эрхэлсэн ахлах эрдэм шинжилгээний ажилтан Нан Тян тэмдэглэсэн байна. Төв болон Баруун Европын орнуудын цэргийн зардлын хэмжээ хүйтэн дайны үеийн түвшиндээ эргэн очсоныг илтгэл бичигчид тэмдэглэжээ.

Төв Европт энэ үзүүлэлт 345 тэрбум ам.долларт хүрсэн бол, бодит дүнгээрээ уг үзүүлэлт 1989 оныхоос давж, 2013 оныхоос гэхэд 30 хувиар нэмэгдсэн дүнд хүрсэн байна. Зарим улс батлан хамгаалах зардлаа хэдийн өсгөсөн байгаа бол, өөр зарим нь мөн өсгөх бодолтой, гэхдээ 10 хүртэл жилээр өсгөх төлөвлөгөөтэй байгаагаа мэдэгдэж байгаа юм. Цэргийн зардал нь хамгийн огцом өссөн орнуудын тоонд Финланд 36 хувиар, Литва 27 хувиар, Швед 12 хувиар, Польшийнх 11 хувиар нэмэгдсэн дүнтэй багтжээ.