Цөмийн зэвсэг тээвэрлэгч шумбагч онгоцнуудаа Вашингтон Өмнөд Солонгост тодорхой хугацаагаар байрлуулах, мөн Сөүлийг цөмийн зэвсгийн ажиллагаа төлөвлөлтдөө оролцуулж байхаар хоёр тал тохирсон байна.

Үүний хариуд Өмнөд Солонгос улс өөрийн цөмийн зэвсэгтэй болох санаагаа хойш тавихыг зөвшөөрсөн тохиролцоог хоёр улсын төрийн тэргүүн нарын уулзалтаас баталсан байна. “Вашингтоны тунхаг” хэмээх энэ баримт бичиг Умард Солонгосын цөмийн аюул заналаас хамгаалах чиглэлд холбоотон хоёр улсын хамтын ажиллагааг бэхжүүлэх болно гэж АНУ-ын ерөнхийлөгч Жо Байден мэдэгджээ.

Тодруулбал, Вашингтонд төрийн айлчлал хийж байгаа Өмнөд Солонгосын ерөнхийлөгч Юн Сок Ёль Вашингтоны тунхгийг, АНУ цөмийн хамгаалалтаа бэхжүүлж, энэ төрлийн халдлагыг тогтоон барих, холбоотнуудаа цөмийн зэвсгийн тусламжтайгаар хамгаалах чиглэлд “урьд байгаагүй” өндөр үүрэг хариуцлага өөртөө хүлээж байгаагийн илэрхийлэл гэж дүгнэж хэлсэн байна. Умард Солонгосын цөмийн зэвсгийн боловсруулалт хэзээнээсээ АНУ, Өмнөд Солонгосын аль алины санааг зовоож байгаа хүнд сэдэв байдаг.

Пхеньян Өмнөд Солонгосын нутагт цохилт өгөх чадалтай тактикийн цөмийн зэвсэг хөгжүүлэхээс гадна АНУ-ын эх газарт хүрэх хэмжээнд зэвсгийн системээ боловсруулдаг. Харин АНУ Өмнөд Солонгосыг гаднын халдлагаас хамгаалах гэрээгээр хүлээсэн үүрэгтэй, шаардлагатай бол цөмийн зэвсэг хэрэглэнэ гэдгээ ч өмнө амлаж байсан. Гэлээ ч Вашингтоны энэ амлалтад эргэлздэг, улсаа өөрийн гэсэн цөмийн хөтөлбөртэй болох нь дээр гэж үздэг нөлөө бүхий улстөрч, эрдэмтэн шинжээчдийн дуу хоолой Өмнөд Солонгост хүчтэй байдаг байна. Тэгвэл сая байгуулсан энэ хэлэлцээр сүүлийн хэдэн сарын туршид хийгдсэн яриа хэлэлцээний үр дүн гэдгийг Вашингтоны засаг захиргааны албаныхан мэдэгдэж байна.

Тэр дагуу АНУ сүүлийн 40 гаруй жилд анх удаа цөмийн шумбагч онгоцоо атомын бөмбөгдөгч онгоцнууд зэрэг стратегийн бусад хэрэгслийн хамтаар Өмнөд Солонгост аваачиж байрлуулах зэргээр хамгаалалтын чиг үүргээ илүү тод томруун харуулж өгөхөөр болж байгаа онцлогтой байна. Үүнээс гадна талууд цөмийн төлөвлөлтийн асуудлаар Зөвлөлдөх Бүлэг байгуулахаар боллоо. Энэ Бүлэг нь Өмнөд Солонгосын засгийн газрын хүсдэг илүү өргөн оролцоо зэрэг бүхий л шаардлага нөхцөлийг нь хангах хэмжээнд ажиллана гэж байна. Оронд нь харин, АНУ цөмийн зэвсэггүй улс хэвээр байж, цөмийн зэвсэг үл дэлгэрүүлэх талд тууштай зогсох шаардлагыг Өмнөдөд тавьжээ.

Өмнөд солонгосын цөмийн зэвсэгтэй болох эрмэлзлийг орхиулах зайлшгүй шаардлагатай, үгүй бол бусад улс мөн адил барьцах нөхцөл үүснэ гэж Вашингтон болгоомжилдог байна. Тэгээд ч ерөнхийлөгч Байден, Умард Солонгосыг яриа хэлэлцээний ширээнд буцаан суулгах оролдлого чармайлтаа орхихгүй гэдгээ өчигдөр мөн мэдэгджээ. Мөн аливаа урьтал болзолгүйгээр хэлэлцээнд орох олон тооны урилга хүсэлтийг нь Пхеньян үл хайхарсныг Вашингтон дурддаг.

АНУ энэчлэн Умард Солонгосыг цөмийн зэвсгээс татгалзуулах  найдлагаа орхиогүй байгаа ч Умардын удирдагч өнгөрсөн онд цөмийн зэвсэгтэй улс гэдэг статус нь эргэлт буцалтгүй болсныг тунхагласан. Тэрчлэн цөмийн зэвсгийг устгах гэхээсээ илүү ийм зэвсгийн хяналтын асуудлыг хэлэлцэх нь илүү бодитой байх талтайг  зарим шинжээчдийн зүгээс мөн хэлж байна.