Японы эрүүл мэндийн яам коронавирусний халдварын хяналтын зэрэглэлийг ирэх сард албан ёсоор бууруулах тов зарлалаа. Тодруулбал, тавдугаар сарын 8-ны өдрөөс тус улс коронавирусийг улирлын томуутай нэг жишигт авч үзэх болж байна.

Ингэснээр коронавирусний халдвартай хүмүүсийг хүлээж авч үйлчилгээ үзүүлэх эмнэлэг, эрүүл мэндийн төвүүдийн тоо хүрээ илүү мэдэгдэхүйц өргөжих юм байна. Өөрөөр хэлбэл, улирлын томуугийн үзлэг оношилгоо, эмчилгээ хийгддэг бүх  64 мянган эмнэлэг эрүүл мэндийн төвд ковидын халдвартай хүмүүсийг мөн адил хүлээн авч үйлчилнэ гэсэн үг юм байна. Түүнээс гадна цар тахлын үед улсын зардлаар хийгддэг байсан коронавирусний оношилгоо эмчилгээний бүх зардлыг одоогоос өвчтөнүүд өөрсдөө гаргах ёстой болж байна.

Мөн халдварын нөхцөл байдлыг засгийн газар нэгдсэн журмаар тодорхойлж нийтэлдэг байдал цаашдаа холбогдох эмнэлгийн байгууллагууд долоо хоног тутам мэдээлэх журамд шилжих юм байна. Мөн үүнээс хойш халдвар хамгааллын зориулалтаар иргэд оршин суугчдыг гэрээсээ гарахгүй байх эсвэл бизнес үйлчилгээний газруудыг ажлын цагаа танах зэрэг уриалга зөвлөмжийг төв болоод орон нутгийн эрх барих байгууллагууд гаргах эрх зүйн үндэсгүй болж байна.

Ганцхан Эрүүл мэндийн яам нь коронавирусний халдвартай нь батлагдаж, эмчилгээ заалгасан хүмүүсийг шинж тэмдэг илэрсэн өдрөөс наад тал нь 5 хоног гэртээ байх зөвлөмж өгдөг хэвээр байх юм байна. Энэ бүх зохицуулалтын талаар өнөөдөр мэдээлэл хийсэн Японы эрүүл мэндийн сайд Като Кацунобу вирус хэдийгээр бүрэн арилж үгүй болоогүй боловч хүмүүсийн аж амьдралыг хэвийн голдиролд нь оруулахын төлөө томоохон энэ алхмыг хийж байна гэжээ.

Үүнээс гадна омикрон зэрэг коронавирусний одоо мэдэгдэж байгаа дэд хувилбаруудаас тэс өөр эмгэг төрүүлэгч шинжтэй шинэ хувилбарууд дэгдэх урьтал нөхцөлүүд тогтоогдох нөхцөлд засгийн газар тэр даруй одоогийн шийдвэрээ эргэн харж арга хэмжээ авна гэдгийг Като сайд мэдээлжээ. Япон улс энэ бямба гарагаас коронавирусний цар тахалтай холбоотой тогтоосон хилийн хорио хяналтын журмаа цуцлахаар болсноо өмнө нь зарласан.

Өнөөдрийн байдлаар, Японд очиж байгаа хүмүүсээс ковидын 3 тун вакцин хийлгэсэн гэрчилгээ, сөрөг шинжилгээний хариу болон бусад баримт шаардах журам үйлчилсэн хэвээр байгаа юм. Энэ мэт журам цуцлагдсанаар ирэх тавдугаар сарын 1-нээс 7-ныг хүртэл үргэлжлэх “Алтан 7 хоног” гэгддэг хаврын урт амралтын үеэр гадаад дотоодод зорчих жуулчдын урсгал эрс нэмэгдэх төлөвтэй байна.

Гэхдээ энэ мэт хорио хязгаарлалтын дэглэм цуцлагдсан ч гэсэн хилээр нь нэвтэрч байгаа халуурсан, ханиалгасан зэрэг шинж тэмдэг бүхий хүмүүст өөрсдийнх нь хүсэлтийг үндэслэж үзлэг, оношилгоо хийгдэх болно гэдгийг албаныхан хэлж байна.