Өмнөд Солонгосын парламентын гишүүн Зүүн тэнгис дэх Такешима аралд очсонтой холбогдуулж Япон улс эсэргүүцэл илэрхийлжээ. Өмнөд Солонгосын хяналтан дахь тус арлыг Япон улс өөрийн гэж үздэг. Мөн Өмнөд Солонгос улс тус арлыг хууль бусаар эзэмшиж байгаад буруутгадаг байна.

Өмнөд Солонгосын парламентын гишүүн Жон Ёонгги нэг намын харьяалал бүхий 14 хүний хамтаар мягмар гарагт тус аралд очсоныг мэдсэн даруйгаа Японы Гадаад Яам ийнхүү эсэргүүцэл илэрхийлжээ. Жон Ёонгги нь Өмнөд Солонгосын гол сөрөг хүчин-Ардчилсан намын улстөрч юм байна. Тэрээр маргаантай арал дээр өмнөд солонгосын далбаатай зургаа авхуулж нийгмийн сүлжээн дэх өөрийн хуудсанд байрлуулжээ. Японы Гадаад хэргийн яамны Ази болон Далайн орнуудын асуудал эрхэлсэн товчооны дарга энэ үйл явдалтай холбогдуулж Токио дахь Өмнөд Солонгосын элчин сайдыг дуудаж, болсон явдалд хүлцэл өчихийг шаардсан байна. Такешима буюу өмнөд солонгосчуудын нэрлэдгээр Токто аралд өмнөдийн улстөрч очсон нь “хэрхэвч хүлээн зөвшөөрч боломгүй, туйлын харамсалтай явдал” гэж Японы Гадаад яамны мэдэгдэлд дурджээ. Япон, Өмнөд Солонгосын харилцаа илт сайжирч, Японы Ерөнхий сайд Фумио Кишида ням гарагт Сөүлд хоёр өдрийн айлчлалаар очихын босгон дээр энэ хэрэг явдал дэгдсэнийг хэвлэлүүд онцолж байна. Кишидагийн айлчлалаар хоёр улсын удирдагчдын хоорондох дипломатын тогтмол харилцаа сэргэж, хоёр талын харилцаа илтэд сайжирч байгаагийн бэлгэдэл болж байгааг Өмнөд Солонгосын засгийн газар өмнө нь тэмдэглэж байсан юм.

Харин тус улсын сөрөг хүчин Ерөнхийлөгч Юн Сок Ёлыг Японтой дангаар зөвшилцөл явуулж байна гэж буруутган, 3-р сард Японд хийсэн айлчлалынх нь дараагаас түүний засгийн бодлогыг улам бүр хүчтэй шүүмжлэх болжээ. Энэ хоёр улсын харилцаа дайны үеийн асуудлууд болоод нутаг дэвсгэрийн маргааны улмаас хэзээний зөрчилдөөнтэй явж ирсэн. Солонгосын хойг 1910-1945 оны хооронд Японы колоничлолд байсан билээ.