“Европын холбооны цагдаагийн алба “Европол” гурван тивд явуулсан “СпекТор” нэртэй тусгай ажиллагааныхаа явцад интернэтээр хар тамхи мансууруулах бодис борлуулах томоохон талбар болсон “Монополи маркет” хар захын үйл ажиллагааг таслан зогсоож чаджээ.

Энэ байгууллагаас өчигдөр мэдээлснээр, 288 баривчилгаа явуулж, 850 кг мансууруулах бодис, 50,8 сая евро бэлнээр болон криптовалют хэлбэрээр хураан авсан байна. Мөн 117 нэгж галт зэвсэг хураан авсан тухай хууль сахиулагчид мэдээлжээ. Интернэт дэх хар сүлжээнд ажилладаг бүлгүүдийн эсрэг хамгийн амжилттай ажиллагааны нэг боллоо гэж Европол байгууллагын мэдэгдэлд дурдсан байна. Ажиллагаанд оролцсон АНУ-ын Хууль зүйн сайд мөн өчигдөр мэдээлэл хийж, олон улсын анхны томоохон энэ хамтарсан ажиллагааны дүнд АНУ-ын хэмжээнд 300-аад хүн баривчлагдаж, 53 сая доллар бэлэн болон криптовалют хэлбэрээр хураагдсаныг мэдээлжээ. Ажиллагаанд Герман, Австри, Швейцарь, Франц, Польш, Нидерланд, Их Британи болон АНУ, Бразилийн мөрдөгчид хамтран оролцсон юм байна. Германд гэхэд, 52 сэжигтнийг саатуулсан бол, Их Британиас 55, АНУ-ын хэмжээнд 153 хүнийг тус тус баривчилсан байна. 2021 оны 12-р сард Германы мөрдөгчид мөн “Монополи маркет” хар захтай холбоотой гэмт хэргийн хэд хэдэн сүлжээг илрүүлж үйл ажиллагааг нь таслан зогсоосноор энэ талын мөрдлөг олон улсын түвшинд гарч байжээ.

Энэ удаагийн ажиллагааны дүнд хар тамхи мансууруулах бодис борлуулагчдаас үйлчилгээ авдаг хэдэн мянган хүний мэдээлэл хууль сахиулах байгууллагуудын гарт орсон, тэдэнд бүгдэд эрүүгийн хариуцлага хүлээлгэх болно гэдгийг “Европол” байгууллага мөн мэдэгдсэн байна.