Өнгөрөгч 4-р сард дэлхийн хүнсний үнийн индекс сүүлийн нэг жилийн хугацаанд анх удаа огцом өссөн дүнтэй гарсан байна. НҮБ-ын Хүнс ХАА-н байгууллагын мэдээгээр, элсэн чихэр, мах, цагаан будааны үнэ нэмэгдсэн нь үнийн индекс огцом өсөхөд нөлөөлсөн байна. Үүний зэрэгцээ одоогийн энэ өсөлтийн дүн жилийн өмнөхөөс 20 хувиар доогуур үзүүлэлт гэдгийг тэмдэглэжээ.

НҮБ-ын Хүнс ХАА-н байгууллага хамгийн өргөнөөр худалдаалагддаг хүнсний бараа бүтээгдэхүүнүүдийн үнийн хэлбэлзэл өөрчлөлтийг олон улсын хэмжээнд сар тутам судалж гаргадаг. Өнгөрөгч 4-р сарын тухайд, үнийн өсөлтийн индекс 127,2 нэгж үзүүлэлттэй гарч, энэ нь өмнөх 3-р сарынхаасаа 0,6 хувиар өссөн дүн болсон юм байна. Тэр дундаа элчин чихрийн үнэ өмнөх сарынхаасаа 17,6 хувиар өссөн нь 2011 оны 10-р сараас хойших үнийн хамгийн өндөр түвшин болсон байна. Энэтхэг, Хятад, Тайланд болон Европын холбооны орнуудын хэмжээнд хуурайшилт ихтэй цаг агаарын нөхцөлөөс шалтгаалан элсэн чихрийн үйлдвэрлэлийн хэмжээ, тэрэнтэй холбоотой хүлээлт төсөөлөл буурсан нь энд гол нөлөө үзүүлжээ. Махны үнийн индекс мөн нэг сарын дотор 1,3 хувиар өсөлттэй гарахад, мал амьтны өвчлөлтэй холбоотойгоор Азид импортын эрэлт ихэссэнээр тахиа, гахайны махны үнэ ханш бас өсөхөд нөлөөлсөн байна.

Үүний зэрэгцээ цагаан будааныхаас бусад гол нэрийн хүнсний барааны үнийн индекс буурах хандлага үргэлжилсэн хэвээр байгааг НҮБ-ын Хүнс ХАА-н байгууллагын гол эдийн засагч Максимо Тореро өчигдөр Ромоос сэтгүүлчдэд зайнаас мэдээлэл хийх үедээ дурдсан байна. Тэрчлэн үр тарианы үнийн индекс 4-р сард өмнөх сарынхаасаа 1,7 хувиар буурсан, гэхдээ энэ нь жилийн өмнөхөөс 19,8 хувиар доогуур үзүүлэлт байна. Мөн улаан буудайн үнэ дэлхийн зах зээл дээр 2.3 хувиар буурсан нь Австрали болон Оросод их хэмжээний экспортын нөөц хураагдсантай холбоотой гэж мэргэжилтнүүд үзсэн байна. Мөн Өмнөд Америкийн ургац хураалттай холбоотойгоор эрдэнэ шишийн дэлхийн зах зээлийн үнэ 3,2 хувиар буурчээ. НҮБ-ын Агентлагийн зүгээс мөн 2023 оны улаан буудайн үйлдвэрлэлийн төлөвөө шинэчиллээ. Эндээс үзвэл, энэ онд дэлхийн хэмжээнд улаан буудай үйлдвэрлэл 785 сая тоннд хүрэхээр байгаа нь ажиглалт явуулж ирсэн түүхэнд 2-т орох өндөр дүн юм байна.

Харин цагаан будааны үйлдвэрлэлийн 2023-24 оны хэтийн төлөвийг харвал, Экваторын дагуух болон түүнээс урагших бүсүүдэд харилцан адилгүй байхаар байгаа нь Ла-Нинья буюу Номхон далай дахь далай, агаар мандлын урсгалын нөлөөллөөс хамааралтай байна. Үүний зэрэгцээ өнөө хэр шийдэгдээгүй байгаа Украины Үр тарианы хэлцэл сунгагдахгүй нөхцөлд ямар үр дагавар учрах тухайд НҮБ-ын Хүнс ХАА-н байгууллагын гол эдийн засагч Тореро, энэ хэлцэлтэй холбоотой тодорхойгүй байдлыг зах зээл хэдийгээр зарим талаар өөртөө шингээн ачаалал үүрч байгаа ч гэлээ “яваандаа үр тарианы үнэ өсөх нь дамжиггүй юм” гэсэн байр суурийг илэрхийлсэн байна.