Лондон хотын Вэстминстрийн ордонд Шинэ хааныг сэнтийд залах өргөн ёслол боллоо. 3-р Чарльз хааны эрин үеийн албан ёсны эхлэл болж байгаа энэхүү түүхэн үйл явдлыг нүдээр үзэхээр олон мянган хүн Лондонд цугларсан байна. Мөн энэ ёс төгөлдөр сүрлэг арга хэмжээ шинэ хааны нэр хүндийг баталгаажуулж байгаа бэлгэдэлт ёслол юм гэдгийг хэвлэлүүд тэмдэглэж байна.

Хаан, хатан нарыг Букингеммийн ордноос гол ёслол болох Вэстминстрийн ордон руу очих замын туршид Хааны торгон цэргийн хүрээний 200 цэрэг дагалдан явсан байна. Сэнтийд залрах ёслол болж байгаа бүтэн өдрийн туршид аюулгүй байдлын хамгаалалтад 4000-аад цэргийнхнийг дайчилжээ. Гэхдээ энэ удаагийн ёслол цар хүрээний хувьд, 1953 онд Хатан хаан 2-р Елизабетийн сэнтийд залрах ёслолынхоос хавьгүй багатай гэдгийг хэвлэлүүд дурдаж байна. Лондонгийн цагаар өдрийн 11 цагт эхэлсэн Хаан сэнтийд залах ёслол хэд хэдэн үе шаттайгаар хоёр цагийн турш үргэлжлэн өндөрлөх тийшээ хандаж байна. 3-р Чарльз хааныг албат иргэдэд нь танилцуулж “Цог жавхлант хаанаар” өргөмжилсний дараа ёслолд хуран цугларагсад хаандаа үнэнчээр зүтгэхээ андгайлж, Хаан 3-р Чарльз хаан андгай өргөх ёслолыг Кантерберийн тэргүүн хамбын удирдлаган дор үйлдлээ. Энэчлэн олон нийтэд ил болон нууцлалын дор үйлдэх олон ёс журмын хамгийн сүүлд хаанд титэм зүүлгэх болон сэнтийд залрах гол ёслолуудыг үйлдэх юм байна. Энэ үеэр хаан 3-р Чарльз Гэгээн Эдуард хааны титмийг нэг л удаа тэргүүндээ заллаа. Хойшид тэр зөвхөн Британийн эзэнт гүрний хаан титмийг зүүх учиртай байна. 3-р Чарльз өөрийн ээж, хатан хаан 2-р Елизабетийг таалал төгссөний дараа буюу 2022 оны 9-р сарын 8-нд албан ёсоор хаанд өргөмжлөгдсөн.

Харин өнөөдрийн титэм залах ёслолын дараагаас түүний хаанчлал эхэлсэнд тооцогдох юм байна. Мөн Тэрээр Их Британийн түүхэнд хамгийн өндөр насандаа буюу 74 насандаа титэм залж байгаа хаан болж байгаа бол, 1066 оноос хойш Вестминстрийн ордонд титэм зүүх ёслол гүйцэлдүүлж байгаа 40 дэх хаан болж байгаа онцлогтой байна. Хааныг бүрэн ёслол үйлдэж дууссаны дараа хатан Камилла-д титэм залах даруухан ёслол мөн болжээ. Хатны хувьд тангараг өргөхгүй юм байна. Энэ удаагийн хаан сэнтийд залах ёслолд хааны гэр бүлийн гишүүд, 203 улсын төлөөлөгчид, улс төр, нийгмийн зүтгэлтнүүд зэрэг 2300 гаруй зочид гийчид уригджээ. Мөн 100-аад улсын төр засгийн тэргүүн нар ёслолд хүрэлцэн очсон байна. Хаан сэнтийд залах ёслолын арга хэмжээ нийтдээ гурван өдөр үргэлжилнэ. Титэм залах үндсэн ёслолоос гадна нийтийн өргөн зугаалга, талбайн үдэшлэг цэнгүүн зэрэг олон арга хэмжээ болох юм байна. Британийн хэвлэлүүдэд албан бус мэдээллүүдээс иш татан мэдээлж байгаагаар, 3-р Чарльз хаан сэнтийд залрах ёслолын нийт зардал 50-100 сая фунт стерлинг буюу 63-125 сая ам.доллар болжээ. Харин 2-р Елизабет хатан хааны ийм ёслолын өртөг зардалд улсын сан хөмрөгөөс одоогийн ханшаар 50 сая фунт гарч байсан байна. Үүний зэрэгцээ сэнтийд залах энэ ёслолын босгон дээр “Таймс” сэтгүүлээс явуулсан санал асуулгаар Британичуудын 62 хувь нь 3-р Чарльзын сайн хаан байна гэж үзэж байгаа дүн гарсан байна. Жилийн өмнө ийм бодолтой Британичууд ердөө 39 хувь байсан байдаг байна.