Сири улс 10 гаруй жилийн дараа бүс нутгийн нөлөө бүхий байгууллага-Арабын улсуудын Холбоонд эргэн нэгджээ. Ардчиллын төлөөх эсэргүүцлийн хөдөлгөөнийг хүчээр нухчин дарж, улмаар өнөө хэр үргэлжилж байгаа иргэний дайны эхлэлийг тавьсны учир тус улс энэ Холбооны гишүүнээс хасагдсан түүхтэй.

Арабын улсуудын Холбоонд гишүүнчлэл нь сэргэснээр Дамаск болон Арабын орнуудын засгийн газрууд хооронд харилцаа харьцангуй дулаарсны тэмдэг болж байна. Гэхдээ энэ нь Арабын улс болгон Сиритэй харилцаагаа сэргээсэн гэсэн үг биш, улс тус бүр асуудлыг бие даан шийдэх учиртай гэдгийг холбооны тэргүүн мэдэгджээ. Сарын сүүлээр Саудын Арабд дээд хэмжээний уулзалтаа хийх гэж байгаа тус холбоонд Сири улс эргэн нэгдсэнээр ерөнхийлөгч Башар Аль-Ассад тус уулзалтад оролцох магадлалтай болж байна. Үүний зэрэгцээ АНУ, Их Британий зүгээс энэ алхмыг эрс шүүмжиллээ. Сири улс гишүүнчлэлээ сэргээх хэмжээнд хүртэл ажиллаагүй гэдгийг Төрийн департаментын төлөөлөгч тэмдэглэж, Сири дэх хямралыг шийдвэрлэх гэсэн Арабын улсуудын Холбооны урт хугацааны зорилтыг дэмжиж байгаагаа илэрхийлсэн байна. Их Британийн Хамтын нөхөрлөл болон Хөгжлийн асуудал эрхэлсэн төрийн сайд Лорд Ахмад, Нэгдсэн Вант улс Ассадын дэглэмтэй холбоо харилцаа өрнүүлэхийн эсрэг хэвээр байгааг хэлээд, “Башар аль-Ассад гэм зэмгүй Сири хүмүүсийг хорьж, эрүүдэн шүүж, амь насыг нь хөнөөсөөр” байгаа гэж мэдэгджээ.

Сирийн Гадаад хэргийн сайд Арабын улсуудын Холбооны шийдвэрийг талархан хүлээн авч байгаагаа мэдэгдээд, “Араб орнуудыг илүү өргөнөөр хамтран ажиллаж, түншлэхэд уриалсан байна. Египетийн нийслэл Каирт болсон тус Холбооны Гадаад хэргийн сайд нарын уулзалтад гишүүн 22 улсын 13-ынх нь төлөөлөл оролцжээ. Асар олон тооны дүрвэгчдийн урсгал бий болгож, хар тамхи мансууруулах бодисын хууль бус худалдааг газар авхуулж байгаа Сирийн иргэний дайныг эцэс болгохын чухлыг сайд нар онцолж байжээ. Би-Би-Си-гийн мэдээгээр, үгүйрэл ядуурал улам газар авч, ажил хөдөлмөр эрхлэх боломж хомс байдлаас болж хүмүүс хар тамхины наймаанд олноор татагдан ордог байна. Энэ талын зорилтуудыг хангахад нь Сирид туслах үүднээс Египет, Саудын Араб, Ливан, Иордан, Ирак улсуудын оролцоотой Хороо байгуулахаар шийдвэрлэжээ.

Сирийн хямралыг шийдвэрлэх үе шаттай үйл явцын эхний алхам нь энэ болохыг Арабын улсуудын Холбооны Ерөнхий нарийн бичгийн дарга Ахмед Абул Гейт мэдэгдсэн байна. НҮБ-ын мэдээгээр, Сирийн иргэний дайны хөлд 300 мянга гаруй хүний амь эрсдэж, 100 мянгаас илүү тооны хүн сураггүй алга болсонд тооцогддог байна. Мөн Сирийн дайнаас өмнөх 21 сая хүн амын талаас илүү хувь нь улс дотроо болон хилийн чанадад цагаачлан дүрвэжээ.