Япон улсын ерөнхий сайд Фумио Кишида, БНСУ-ын ерөнхийлөгч Юун Сок Ёл нар хоёр талын харилцааг сэргээх тодорхой алхмууд дээр харилцан тохирсон байна. Тухайлбал Өмнөд Солонгос цацраг идэвхтээр бохирдсон усыг далайд нийлүүлэх Токиогийн төлөвлөгөөг судлах тусгай мэргэжилтний багаа Япон руу илгээхээр тохирчээ. Түүнчлэн аюулгүй байдлын талбарт Умард Солонгосын цөмийн болон пуужингийн аюул заналын эсрэг Америктай гурван талын аюулгүй байдлын хамтын ажиллагааг бэхжүүлэхээр болж байна.

Өнгөрсөн 3-р сард Өмнөд Солонгосын ерөнхийлөгч Японд төрийн айлчлал хийснээс хойш хоёрхон сарын дараа Токио хариу айлчлал хэрэгжүүллээ. Кишидагийн Сөүлд хийсэн энэхүү айлчлал Япон, Өмнөд Солонгос улсууд 12 жилийн дараа хоёр талын дээд хэмжээний айлчлалыг бүрэн сэргээснийг гэрчилж байна. Солонгос үндэстэн 1950 оны дайнаар хоёр хуваагдсанаас хойш Япон Өмнөд Солонгосыг Солонгосын хойг дахь цорын ганц хууль ёсны засгийн газар гэж хүлээн зөвшөөрч 1965 онд дипломат харилцаа тогтоосон. Япон, Өмнөд Солонгос хоёр Америкийн НАТО-гийн гишүүн бус холбоотон, Ази дахь гол түншүүд нь. Гэвч сүүлийн жилүүдэд газар нутгийн маргаан, Японы эзэнт гүрний үед Солонгос үндэстнийг колоничилж байсантай холбоотой үзэл бодлын зөрүү, Япончууд дэлхийн хоёрдугаар дайны үед Солонгос эмэгтэйчүүдийг хөдөлмөрийн болон бэлгийн мөлжлөгт оруулсныхаа төлөө уучлал гуйх, нөхөн төлбөр төлөхгүй байгаа зэргээс хөрш хоёр орны харилцаа 12 жилийн хугацаанд хүйтэн уур амьсгалтай байж ирсэн. Японы одоогийн засаг түүхэн асуудлаарх өмнөх засгийн газруудынхаа байр суурийг хадгалж байна. Харин Өмнөд Солонгос улс түүхэн асуудлыг шийдвэрлэхээр хохирогчдын ар гэрт нөхөн төлбөр олгох төлөвлөгөөг хэрэгжүүлнэ гэсэн байр суурьтай байна.

Япон улсын ерөнхий сайд Фумио Кишида: “Хэдийгээр өнгөрсөн үеийн гашуун түүхийг мартаагүй олон хүн байгаа ч гэсэн Ерөнхийлөгч Юн Сок Ёл ирээдүйнхээ төлөө шийдвэр гаргасан гэж хэлэхэд миний сэтгэл их хөдөллөө. Олон хүн ийм хатуу үеийг туулсан нь надад их гунигтай, зүрх эмтэрдэг. Хоёр орны дунд түүхийн асуудал бий. Гэхдээ зовлон зүдгүүрийг даван туулж, Өмнөд Солонгостой үргэлжлүүлэн хамтрах ажиллаж ирсэн өмнөх засгийн газруудын үйл хэргийг үргэлжлүүлэх ерөнхий сайд миний үүрэг” гэж ярьсан юм.

Япон улс дээд хэмжээний уулзалт болон бусад яриа хэлэлцээний замаар Өмнөд Солонгостой хоёр талын харилцааг сайжруулах, хөгжүүлэхийг эрмэлзэж байна. Тухайлбал Япон энэ сарын 19-нд Хирошимад болох Долоогийн бүлгийн дээд уулзалтад ерөнхийлөгч Юн Сок Ёлыг оролцохыг урьсан. Энэ уулзалтын үеэр Умардын эсрэг Америктай гурван талт аюулгүй байдлын механизм бүрдүүлэх зорилготой байна.

БНСУ-ын ерөнхийлөгч Юн Сок Ёл: “Умард Солонгосын цөмийн зэвсгийн заналхийлэл хоёр орны аль алин руу чиглэж байна. Иймээс аюулгүй байдлын хамтын ажиллагаа урьд урьдынхаас илүү хэрэгтэй. Одоогоор манай улс Америктай хамтран ажиллахаар Вашингтоны тунхаглал баталсан. Япон улс энэ тунхаглалд нэгдэх бололцоог үгүйсгэхгүй” гэж ярилаа.

Мөн хоёр орны хооронд цөмийн цацрагаар бохирдсон усыг далайд асгахтай холбоотой асуудал бий. 2011 онд Фукушимагийн цөмийн станцын доголдлоос болж алдагдсан цөмийн цацрагаар бохирдсон усыг Япон улс далайд цутгахаар төлөвлөж байгаа. Иймд Өмнөд солонгос иргэдийнхээ шаардлагын дагуу бохирдсон усыг далайд цутгахад аюулгүй эсэхийг шинжлэх ухааны үүднээс баталгаажуулахын тулд мэргэжилтний багаа илгээхээр болж байна.