Арабын холбоо 12 жилийн турш түдгэлзүүлсэн Сири улсын гишүүнчлэлийг сэргээхээр шийдвэрлэсэн байна. Сирийн эрх баригчид ардчиллын төлөөх ард иргэдийнхээ тэмцлийг хүчээр дарсны хариуд 2011 онд Арабын холбоон дахь Сирийн гишүүнчлэлийг түр түдгэлзүүлсэн юм. Арабын холбоо нь Арабын орнуудын аюулгүй байдал, тусгаар тогтнол, бүрэн эрхт байдлыг бэхжүүлэх, ойр хамтын ажиллагаатай байлгахыг гол зорилгоо болгодог юм байна.

Египетийн нийслэл Каир хотноо болсон Арабын холбооны гишүүн орнуудын гадаад хэргийн сайд нарын уулзалтаар Сирийн гишүүнчлэлийг сэргээхээр тохирчээ. Сирийн ерөнхийлөгч Башар Аль Ассадыг хэрвээ хүсвэл энэ сард Саудын Арабд болох Арабын холбооны дээд хэмжээний уулзалтад оролцож болно гэж тус холбооны ЕНБД мэдэгдсэн байна.

Сирийн иргэний дайны хугацаанд Арабын зарим улс тэр дундаа Саудын Араб засгийн газрын эсрэг хүчнүүдийг дэмжиж ирсэн юм. Гэхдээ сүүлийн жилүүдэд Орос, Ираны дэмжлэгээр Сирийн үндэсний арми ялалтад хүрэх тодорхой ахиц гарч байгаа учир Арабын зарим улс Сиритэй харилцах харилцаагаа сэргээхийг эрмэлзэж байгаа юм байна. Арабын холбооны дийлэнх орнууд Сирид Ираны нөлөө өсөн нэмэгдэж байгаад ихээхэн болгоомжилдог. Иймээс тэдгээр орон Ассадын засгийн газартай харилцаагаа сайжруулах замаар Сири дэх Ираны нөлөөг хязгаарлах зорилготой байгаа юм байна. Гэхдээ арабын холбооны нөлөө бүхий зарим гишүүн Сирийг арабын холбоонд эргүүлж оруулахын эсрэг байгаа. Тухайлбал Катар улс Сирийг эргүүлж авахыг эсэргүүцэж, өчигдрийн уулзалтад гадаад хэргийн сайдаа оролцуулаагүй. Арабын холбооны гишүүн 22 орноос 13 нь л Каирын уулзалтад гадаад хэргийн сайдаа илгээсэн байна.