Австралийн засгийн газар айл өрх, бизнес эрхлэгчдийн амьжиргааны өртгийг бууруулах зорилгоор холбооны төсөвт 10 тэрбум ам.долларын тодотгол хийхээр болжээ. Төсөвт тодотгол хийснээр инфляц хөөрөгдөхгүй гэж засгийн газар нь үзэж байна. Одоогоор тус улсын инфляц сүүлийн 30 жилд хамгийн өндөр буюу 7 хувьтай байна.

Австралийн зүүн төвийн үзэл баримтлалтай Хөдөлмөрийн намын тэргүүлж байгаа засгийн газар үнийн өсөлтийн дарамт, инфляцыг шууд бууруулах зорилгоор төсөвт тодотгол хийх нь зүйтэй гэж үзжээ. Уг нэмэлт төсвийг ирэх 4 жилийн хугацаанд орлого багатай 5 сая айл өрх, бичил бизнес эрхлэгчид, тэтгэврийн иргэдэд зарцуулах юм байна. Австралийн нөөцийн банк бүтээмжийн өсөлт бага, эрчим хүчний үнэ, түрээсийн үнэ өсөж байгаа зэрэг нь инфляцад нөлөөлөх эрсдэлүүдийг нэмэгдүүлэх хандлагатай байгааг анхааруулжээ. Австралийн засгийн газар 4 жилийн хугацаанд өндөр настан асрагчдын цалинг нэмэгдүүлэхэд 7 тэрбум гаруй ам доллар төсөвлөж, тамхинд 5 хувийн нэмэлт татвар ноогдуулж, газрын тос байгалийн хий үйлдвэрлэгчдээс 1,6 тэрбум долларын нэмэлт татвар авахаа зарласны дараа дахин 10 тэрбумын төсөв гаргахаа зарлаж байна. Тус улс түүхий эдийн экспортоос орох татварын орлого өсөх хандлагатай байгаагаас төсвийн алдагдал нь буурна гэж тооцож байна.