Хятад, Пакистан, Афганистаны улс төрийн харилцаа гүнзгийрэхийн хэрээр аюулгүй байдал, эдийн засаг, терроризмтой тэмцэх чиглэлд гурван талт хамтын ажиллагааг өргөжүүлэхээр гадаад харилцааны сайд нарын түвшинд хэлэлцлээ. Талууд Хятад, Пакистаны эдийн засгийн коридорыг Афганистаны нутаг руу сунгахыг дэмжсэн байна. Ингэснээр Хятадын хөрөнгө оруулалт Афган, Пакистаны аль алин руу орох бололцоотой болох юм.

Пакистаны нийслэлд болсон уулзалтад Афганистаны гадаад хэргийн сайдын үүрэг гүйцэтгэгч оролцож, Хятад, Пакистантай хэд хэдэн чиглэлд хамтран ажиллах талаар санал нэгдсэн байна. Хятад, Пакистан хоёр Талибаны тэргүүлж байгаа Афганы засгийн газрыг алан хядагч бүлэглэлүүдтэй тэмцэх хүчин чадлаа өргөжүүлэхэд нь дэмжлэг үзүүлэх, хамтарч ажиллахаа илэрхийллээ. Мөн Бээжин, Исламабад улс орнууд Афганистаны дотоод хэрэгт хөндлөнгөөс оролцох, нэг талыг барьсан хориг тавихыг эсэргүүцэхээр санал нэгдсэн байна. Түүнчлэн эдгээр улсууд Афганд хүмүүнлэгийн тусламжаа үргэлжлүүлэхээр болжээ. Хятадын хувьд эдийн засгийн коридороор дамжуулан олон тэрбум долларын хөрөнгө оруулалт хийж байгаа, одоогоор Пакистанд автозам, төмөр зам тавьж, далайн боомтуудыг бүтээн босгож байна. 2021 оны 8-р сард Талибан хөдөлгөөн Афганистаны төрийн эрхийг авснаар Америк тус улсаас цэргээ гаргаж, олон улс ч Афганистаныг тусгаарлах болсон. Үүнээс үүдэж Афганистан эдийн засаг, хүмүүнлэгийн хямралд орсон. Талибаны засгийн газар зэс, лити зэрэг ашигт малтмалын арвин нөөцөө ашиглахын тулд Хятадын хөрөнгө оруулалтыг татахыг эрмэлзэж байгаа, нөгөө талд Хятад ч Афганы байгалийн баялагт хөрөнгө оруулах сонирхолтой байгаа. Энэ ч үүднээс Хятадын тал Бүс ба зам санаачилгадаа Афганыг оролцуулах, бүс нутгийн эдийн засгийн харилцаа хамтын ажиллагаанд Кабулыг татан оруулахыг өнгөрсөн сард мэдэгдсэн.