Мягмар гарагийн үүрээр Израилын онгоцууд Газын зурваст довтолж, Исламын Жихадын байгууламжуудад цохилт өгсөн байна. Мөн энэ үеэр Исламын гурван цэргийн дээд албан тушаалтан өртөж амиа алдсан гэж мэдээлжээ.

Израилын армиас Мягмар гарагийн өглөө хийсэн дайралтынхаа талаар мэдээлэл хийж, бөмбөгдөлтийг Ираны дэмжлэгтэй бүлэглэлийн гурван ахлах командлагчийн байр руу онилсон байсан гэж мэдэгдлээ. Эдгээр хүмүүс нь саяхан Израил руу пуужин харвасан хэрэгт буруутай гэж нэмж хэлжээ. Энэ ажиллагааг “Бамбай ба сум ажиллагаа” гэх бөгөөд  Газын зурвасын хойд хэсэгт байрлах Исламын жихад бүлэглэлийн командлагч Халил Бахтини, тус бүлэглэлийн Газын болон Баруун эрэг дэх гишүүдийн хооронд зуучлагч Тарек Иззелдин, нарийн бичгийн дарга Жехад Ганам нар өртсөн гэдгийг эх сурвалжууд мэдээллээ.

Мөн Исламын Жихад бүлэглэл гурван ахлах командлагч, мөн тэдний гэр бүлийн гишүүд өртөн амиа алдсан гэж нотолж байна. Гэрчүүдийн мэдээлснээр, Газа хотын нэгэн орон сууцны дээд давхарт болон өмнөд нутгийн Рафах хотын орон сууцны барилгад дэлбэрэлт болсон байна. Агаарын дайралт үүрээр болж, дайчдын бэлтгэл сургуулилтын цэгүүдийг онилсон байжээ. Палестины Эрүүл мэндийн яам агаарын довтолгооны улмаас олон хүн амь үрэгдэж, шархадсан гэж мэдэгдсэн ч дэлгэрэнгүй мэдээлэл одоогоор өгөөгүй байна. Энэхүү хурцадмал байдал нь Баруун эрэгт хүчирхийлэл нэмэгдэж байгаатай холбоотой бөгөөд Израилын зүгээс сүүлийн саруудад тэдний эсрэг халдлага төлөвлөж, үйлдсэн байж болзошгүй гэж үзсэн палестинчуудыг баривчлах зорилгоор өдөр бүр дайралт довтолгоон хийх болжээ.