Мягмар гарагт Ерөнхий сайд асан Имран Ханыг баривчилсны дараагаас Пакистан даяар ширүүн эсэргүүцэл тэмцэл газар аваад байна. Экс-ерөнхий сайдыг дэмжигчид болон аюулгүйн хүчнийхний хоорондох мөргөлдөөний улмаас Кветта хотод нэг хүний амь эрсэдсэн байна.

Тодруулбал, НҮБ болон Их Британи улсын зүгээс “хууль ёсыг” дээдлэн сахихад уриалжээ. Пакистаны нийслэл Исламабад хот дахь Дээд шүүхийн гаднаас аюулгүйн хүчнийхэн Имран Ханыг баривчлан авч явж байгаа дүрс бичлэг дээр, хэдэн арван цагдаа дайран ирж, 70 настай улстөрчийг машинд хүчээр суулган авч явж байгаа нь харагджээ. Имран Хан өөрийг нь, улстөрийн шалтгаантайгаар авлигын хэрэгт буруутгаж байна гэж мэдэгдэж байсан байна.

Имран Ханы тэргүүлдэг “Пакистаны Шударга ёсны төлөө хөдөлгөөн” нам гишүүд дэмжигчдээ эсэргүүцэлд уриалсны дараагаас Лахор, Пешавар, Карачи хотуудад эсэргүүцэл дэгдэж, нийслэл Исламабадад хэдэн зуун хүн хотын гол замуудын нэгийг хааж, хотоос орох гарах хөдөлгөөн зогсчээ. Таван офицер гэмтэж бэртсэний дээр, эсэргүүцэлд оролцогч 43 хүнийг саатуулсан тухай Исламабадын цагдаагийн газар мэдээлсэн байна. Пакистан даяар голчлон армийн анги хэсгүүдийн дэргэд эсэргүүцэл тэмцэл газар авчээ. Улмаар Дотоод хэргийн яамны тушаалаар, үүрэн холбооны мэдээлэл дамжуулах үйлчилгээг түр хаасан байна.

Пакистаны арми цэргийн эргэлт хийж засгийн эрхийг булаах эсвэл хөшигний араас хөшүүрэгдэх замаар улстөрийн амьдралд хүчтэй нөлөө оролцоотой байдаг байна. Твиттерийн нэг бичлэг дээр, Лахор хотод цугларсан олон нэгэн цэргийн командлагчийн байшинд дайран орж, бүх зүйлийг сандаачиж байжээ. АНУ-ын төрийн нарийн бичгийн дарга Энтони Блинкен, “Пакистанд ямар ч нөхцөлд хууль дээдлэх ёс, үндсэн хуулийг сахин мөрдөх”-д уриалжээ. Их Британий Гадаад хэргийн сайд Жеймс Клеверли мөн, Британи улс Хамтын нөхөрлөлийн гишүүн Пакистан улстай урт удаан хугацааны ойр нягт харилцаатай явж ирсний хувьд, хууль ёсыг дээдлэн сахина гэдэгт итгэлтэй байхыг хүсч байгаагаа мэдэгдсэн байна. Өнгөрсөн оны 4 дүгээр сард Ерөнхий сайдын албанаас буусан цагаас нь Имран Ханд олон арван хэрэг тулгаж шүүхээр мөрдөн шалгаж эхэлжээ.

Улмаар түүнийг Лахор хот дахь гэрээс нь баривчлах хэд хэдэн удаагийн оролдлого, гэрийг нь хориглон хаасан дэмжигчдийн эсэргүүцлээс болж бүтэлгүйтэж байжээ. Саяны мягмар гарагт Исламабадын Дээд шүүхийн гадаах замуудыг цагдаагийнхан бүрэн хаасан байснаас Имран Ханы дэмжигчид төдийлөн олноор цуглаагүй байсан нь баривчилгаа явуулах боломж олгосон байна. 2018 онд Пакистаны Ерөнхий сайд болсон Имран Хан армитай зөрчилдөж, мөн парламент дахь дэмжлэгээ алдсанаар өнгөрсөн оны дөрөвдүгээр сард албан тушаалаасаа буусан юм. Тэр цагаас Имран Хан улс орондоо ээлжит бус сонгууль явуулахыг уриалж иржээ. Пакистанд энэ оны сүүлээр бүх нийтийн сонгууль болох товтой байна.