Америкийн Сенатын танхимд олонх Ардчилсан нам, Конгрессын танхимд олонхийн суудалтай Бүгд найрамдах нам засгийн газрын өрийн дээд хязгаарыг нэмэгдүүлэх эсэхээ нэг тийш шийдэх шаарлагатай тулгараад байна. Хэрвээ тохирч чадахгүй бол АНУ-ын засаг захиргаа гурван долоо хоногийн дараа 31,4 их наяд ам.долларын өрөө төлөх чадваргүй болсоноо зарлах эрсдэл тулгараад байна. Ерөнхийлөгч Байден, төлөөлөгчдийн танхимын дарга Кевин МакКарти нар холбооны засгийн газрын өрийн дээд хязгаарыг нэмэгдүүлэх талаар хэлэлцсэн ч санал нэгдэж чадахгүй байна. Баасан гарагт дахиад хэлэлцэхээр товлолоо.

Байден өрийн дээд хязгаарыг нэмэгдүүлэх сонирхолтой байгаа боловч Бүгд найрамдах намынхан төсвийн зардлаа танах нь зүйтэй гэж үзэж байна. Бүгд найрамдахчууд ерөнхийлөгчөөс ямар ч шинэ санаа олж харсангүй, хэлэлцээг хэтэрхий оройтож хийж байна, цагаан ордонд нөөц хувилбар байхгүй байна гэж шүүмжилж байгаа. Харин Байден ковидын тусламжийн сангийн ашиглаагүй хөрөнгийг төсөв рүү татаж, асуудлыг конгрессоор оруулахгүй шийдэх сонирхолтой байгаа юм байна. АНУ-ын төсвийн сахилга батыг зохицуулах зорилготой өрийн дээд хязгаарын тухай хууль нь засгийн газрын зээлийг тодорхой түвшинд хязгаарлаж байдаг. Америкийн сангийн сайд Жанет Йеллен хэрвээ Конгресс өрийн дээд хязгаарыг нэмэгдүүлэхийг зөвшөөрөхгүй бол засгийн газар 6-р сарын 1-н гэхэд дефолт зарлахаас аргагүй болно гэдгийг анхааруулсан. Америкийн өр өнгөрсөн 1-р сард дээд хязгаартаа аль хэдийн хүрсэн.

Үүнээс хойш Сангийн яам нь бэлэн мөнгөний нийлүүлэлтээ хангахын төлөө тусгай арга хэмжээ авсан ч нөөц нь шавхагдаж байгаа юм байна. Ерөнхийлөгч Байден өрийн дээд хязгаарыг нэмэгдүүлэх асуудал хамгийн чухал гэж мэдэгдэж байгаа. Хэрвээ үүнийг ойрын үед шийдэж чадахгүй бол 19-нд Хирошимад болох Долоогийн бүлгийн дээд уулзалтанд оролцож чадахгүй байж магадгүй юм байна.