БНТУ-д ирэх Ням гарагт ерөнхийлөгчийн болон парламентын сонгууль болох гэж байгаа. Энэ сонгуулиар иргэд одоогийн ерөнхийлөгч Эрдоганы эрх мэдлийг 3 дахь арван жилд нь дахин сунгах уу эсвэл илүү ардчилсан замналыг сонгох уу гэдэг эгзэгтэй шийдвэрийг гаргах гэж байгааг олон улсын тоймчид онцолж байна. Мөн тус улсад эдийн засгийн огцом уналт нүүрлэж, инфляцын өсөлт гаарч, цочирдом газар хөдлөлтийн гамшиг болсноос хэдхэн сарын дараа бүх нийтийн болох гэж байгаагаараа олон улсын анхаарлыг татсан нэг сэдэв болж байна.

69 настай Режип Тайип Ердоган нь Туркийн хамгийн удаан төрийн эрх барьж байгаа улс төрч юм. Тэрээр 20 жил төрийн дээд алба хашжээ. Түүний авторитар засаглалыг улиран сонгох эсвэл ардчилсан замналыг сонгох гэсэн 2 салаа замын уулзвар дээр Туркийн ард түмэн 5-р сарын 14-нд санал хураалгана. Энэ удаагийн сонгууль Эрдоганы засаглалд томоохон сорилт авч ирэх болов уу гэж улс төр судлаачид дүгнэж байна. Түүний гол өрсөлдөгч бол иргэний, зүүн төвийн үзэл баримтлалтай Бүгд Найрамдах Ардын Намын дарга Кемал Киличдароглу юм. Өдгөө 74 настай энэ улстөрч Эрдоганы бүтээсэн ерөнхийлөгчийн гүйцэтгэх засаглалын тогтолцоог халж, хяналт тэнцвэртэй парламентын ардчилал руу замнахаа амласан зургаан намын эвслээс нэр дэвшиж байна. Урьдчилсан судалгааны үр дүнгээр бол Киличдароглу Эрдоганаас ялимгүй саналын илүүтэй явж байгааг судлаачид танилцуулсан. Энэ нь Турк улсад Эдийн засаг хямарч, инфляц өндөрсөж, амьжиргааны түвшин багассан зэрэг олон нийтийн эсэргүүцэлтэй тулгарсан Эрдоганы нэр хүнд бага зэрэг уналттай байгааг харуулж байна гэжээ. Тиймээс Эрдоган инфляцад хамгийн их нэрвэгдсэн нийгмийн бүлэгт түр зуурын тусламж үзүүлэхийг зорьж цалин, тэтгэврийн доод хэмжээг нэмэгдүүлэх, зарим иргэдэд эрт тэтгэвэрт гарах боломжийг олгох, хэрэглэгчдэд цахилгаан, байгалийн хийн дэмжлэг үзүүлэх зэрэг хэд хэдэн арга хэмжээг зарласан байна.

Мөн Туркийн өмнөд хэсэгт 50,000 гаруй хүний аминд хүрсэн газар хөдлөлтийн гамшгийн дараа түүний засгийн газар хангалтгүй хариу арга хэмжээ авсан гэх шүүмжлэлд өртсөн юм. Түүний улс төрийн өрсөлдөгчид засгийн газар хариу арга хэмжээг хэт удаан авсан бөгөөд барилгын стандарт дүрмийг дагаж мөрдөөгүйн улмаас амиа алдагсдын тоо ийм өндөр байна гэж буруутгаж байгаа.

Тиймээс олон жил улс орныг удирдсан Эрдоган дээрх шалтгаануудын улмаас албан тушаалаасаа буух уу эсвэл дараагийн 3 дахь арван жилдээ улс орныг толгойлох уу гэсэн эгзэгтэй шийдвэрийг Турк улсын 64 сая иргэн хийх гэж байна. Мөн 600 парламентын гишүүнийг сонгоход санал хураалгана. Энд Сөрөг хүчний хувьд амлаж байгаа ардчилсан шинэчлэлийнхээ зарим хэсгийг ч болтугай хэрэгжүүлэхийн тулд олонхын санал авах шаардлагатай байгаа. Туркэд эдгээр сонгууль саналаа өгөх нь зайлшгүй үүрэг байдаг тул жил бүрийн сонгуулийн ирц өндөр байдаг байна.