Японы иргэд Токиогийн цахилгаан эрчим хүчний компанийн өмнө цугларч, засгийн газрынхаа цацраг идэвхт бохир усыг далайд цутгах төлөвлөгөөг эсэргүүцэн жагслаа. 2011 онд хүчтэй газар хөдлөлт болсны улмаас цунами үүсч, Фукушимагийн атомын станц эвдэрч, гурван реактор хайлсныг хөргөх ажиллагаанд зарцуулсан 1.25 сая тонн бохир усыг далайд цутгах эсэх асуудал нэлээд маргаан дагуулж байна.

2011 оны 3-р сарын 11-нд Японы зүүн хойд эрэгт газар хөдлөлт болсны улмаас цунами үүсэж, Фукушимагийн атомын станц эвдэрч, зургаан цөмийн реакторынх нь гурвыг хайлуулж, тэдгээр хайлсан реакторуудыг хөргөхөд 1.25 сая тонн ус зарцуулжээ. Энэ хаягдал ус цөмийн найрлагатай тул яаж хаана хаях нь Японы иргэдийн төдийгүй бүс нутгийн анхаарлын төвд байдаг асуудал. Харин Японы засгийн газар дотоод, гадаадын эсэргүүцлийг үл тоомсорлон 2021 оны дөрөвдүгээр сарын 13-нд энэ усыг далайд цутгах шийдвэр гаргасан.

Мөн энэ оны эхээр засгийн газар цацраг идэвхт бохир усыг энэ оны хавар эсвэл зуны аль нэгэнд Номхон далайд гаргана гэж мэдэгдсэн юм. Үүнээс шалтгаалан Токио хотын оршин суугчид гудамжинд гарч уриа лоозон барьж, хаягдал ус гаргах төлөвлөгөөг эсэргүүцэж, цөмийн ослын хариуцлагыг Япон улс дангаар үүрэх ёстой учир цацраг идэвхт усыг далайд гаргахгүй байхыг уриалжээ. Учир нь энэ ус хэдийгээр Олон удаагийн боловсруулалтын системээр цэвэршсэн ус ч хүн болон байгальд бүрэн аюулгүй гэх энэ төлөвлөгөөг эргэлзээтэй гэж үзсэн байна. “Токиогийн цахилгаан эрчим хүчний компани бохирдсон усны талаарх бодит мэдээллийг ил гаргаагүй. Эдгээр мэдээллийг олон нийтэд зарлаагүй бөгөөд нуугдмал байна.

Бид цөмийн бохирдсон усыг далай руу цутгахыг эрс эсэргүүцэж байна. Усыг хаях өөр олон арга бий, гэвч засгийн газар болон Токиогийн эрчим хүчний компани энэ тал дээр эрэл хайгуул хийхгүй байна" гэж нэгэн жагсагч шүүмжилжээ.