Туркийн ерөнхийлөгчийн сонгуульд нэр дэвшигч Мухаррам Инже өчигдөр нэрээ татаж байгаагаа зарласнаар сонгуулийн санал хураалтын даваан дээр өрсөлдөөн улам ширүүсжээ. Ням гарагт болох Ерөнхийлөгчийн сонгуульд өрсөлдөгч 4 нэр дэвшигчийн нэг нь Мухаррам Инже байсан юм.

59 настай тэрээр өчигдөр нэрээ татах шийдвэрээ зарлах үедээ үлдэж байгаа нэр дэвшигчдийн хэнд ч онцлон дэмжлэг илэрхийлээгүй байна. Зүүн төвийн үзэл баримтлал бүхий “Эх орон” намынхаа төв байрны өмнө сэтгүүлчдэд мэдээлэл хийхдээ энэ улстөрч, “Би сонгуулийн өрсөлдөөнөөс гарч байна. Би эх орныхоо төлөө үүнийг хийж байна” гэж мэдэгджээ. Ингэснээр “Эх орон” нам Кемаль Кылычдароглугийн тэргүүлж байгаа сөрөг хүчний зургаан намаас бүрддэг “Үндэсний эвсэл”-ээс санал хороож байгааг ажиглагчид тэмдэглэж байна. “Эх орон” нам болоод “Үндэсний эвслийн” аль аль нь Туркийн засгийн эрхийг 20 жилийн турш барьж байгаа консерватив үзэлт одоогийн Ерөнхийлөгч Рэжеп Таип Эрдоганыг түлхэн унагах эрмэлзэлтэй байна. Инже ерөнхийлөгчийн сонгуулийн өрсөлдөөнөөс татгалзсан боловч нам нь ням гарагийн парламентын сонгуульд оролцох учиртай. Мухаррам Инже сонгуулийн санал хураалт болохоос хоёрхон сарын өмнө сунгаанд орж ирснээр урьд нь, чамгүй шүүмжлүүлж байжээ. Тэрээр энэ шийдвэрээ хамгаалж, өөрийгөө 74 настай Кылычдароглугийн залуу хувилбар болж болох юм гэж мэдэгдэж байжээ. Түүнийг сунгаанаас гарахаа зарласны дараа Кылычдароглут “Твиттер” хуудсаараа дамжуулж, Инжегийн дэмжлэгт найдлага тавьж байгаагаа илэрхийлсний сацуу “Гомдлоо хойш нь тавьцгаая” гэж жиргэжээ. Энэ тухайд Ерөнхийлөгч Эрдоган харин Анкарад болсон улстөрийн арга хэмжээн дээр, “Нэг нэр дэвшигч нэрээ татлаа. Яагаад ингэснийг ойлгох юм алга. Үнэндээ би харамсаж байна. Тэр эцсийг нь үзэх хэрэгтэй байсан юм” гэжээ. Сүүлийн үеийн олон нийтийн санал асуулгуудаас үзвэл, Кылычдароглу Эрдоганаас тун ялигүй тэргүүлж яваа боловч ням гарагийн санал хураалтаар илт давуу ялалт байгуулахад шаардлагатай 50 хувийн босгыг давахааргүй байна. Нэг ч нэр дэвшигч 50-иас дээш хувийн санал аваагүй нөхцөлд хоёр долоо хоногийн дараа хоёрдахь шатны санал хураалт явуулах юм. Гэхдээ Инже сунгаанаас гарснаар “Эх орон” намыг дэмжигч сонгогчид “Үндэсний Эвсэл”-ийг дэмжиж, Кылычдароглу-д цэвэр ялалт авчирч мэдэх талтай байна. Туркийн “Метрополл” судалгааны агентлагийн санал асуулгаар, Инже-г дэмжигчдийн 49 хувь нь Кылычдароглу-г, 22 хувь нь Эрдоганыг дэмжих төлөв гарчээ.