Украины ерөнхийлөгч Володимир Зеленский Оросын түрэмгийллийн эсрэг явуулахаар зэхэж байгаа сөрөг давшилтдаа бэлтгэхэд нь илүү хугацаа хэрэгтэй байгаа тухай мэдэгджээ. Тэрээр өчигдөр “Евровижн” холбооны гишүүнчлэлтэй олон нийтийн радио телевизүүдэд ярилцлага өгөх үедээ, “цэргүүдэд нь хуягт машин зэрэг зарим тодорхой төрлийн зэвсэг техник дутагдалтай байна гэж ярьсан байна.

“Одоо байгаа хүч нөөцөөрөө бид давшиж амжилт гаргах боломжтой. Гэхдээ маш олон хүнээ алдаж болзошгүй. Миний бодлоор, ийм байдал гаргаж болохгүй. Тиймээс бид хүлээх шаардлагатай байна. Дахиад жаахан хугацаа хэрэгтэй” гэж Зеленский ярьжээ. Зеленский өрнөдийн удирдагчдаас Оросын гүн ар тал руу тусах чадвартай пуужингууд өгөхийг шаардаж байна. Украин хэдэн сарын турш сөрөг давшилтад бэлтгэж байгаа мэдээлэлтэй байгаа. Гэхдээ сүүлийн 7 хоногуудад Киевийн албаныхан энэ ажиллагааны талаарх хүлээлтийг бууруулахыг чармайсан мэдэгдлүүд хийх болсныг хэвлэлүүд тэмдэглэж байна. Лхагва гарагт германы “Бильд” сонинд нийтлэгдсэн ярилцлагад Украины Гадаад хэргийн сайд Сергей Кулеба сөрөг давшилт сүүлийнх байхгүй” гэдгийг дурдсан байна. “Украины газар нутгийг чөлөөлөх Киевийн зорилго одоогийн сөрөг дайралтаар биелэхгүй нөхцөлд бид дараа дараагийн дайралтуудыг хийхэд бэлтгэх ёстой болно” гэж мэдэгджээ. Үүний зэрэгцээ Украины офицерууд Бахмутын төлөө тулаанд мэдэгдэхүйц амжилт олсон гэж мэдэгдсэн байна. Гэхдээ эсрэг талын дайралт довтолгоо тасрахгүй байгааг тэд тэмдэглэж байна.

Оросын хөлсний цэргүүдийн “Вагнер” групп зэвсгийн нөөц нь шавхагдаж байгаа гэж мэдэгдсэн боловч тэдний зүгээс буудалт намжихгүй байгааг тэд хэлж байна. Үүний зэрэгцээ Оросын Ерөнхийлөгчийн хэвлэлийн төлөөлөгч Дмитрий Песков өчигдөр Боснийн телевизэд өгсөн ярилцлагадаа, Украин дахь Оросын зорилго хангагдах болоогүй гэж мэдэгджээ. Тэрээр мөн Оросын цэргийн ажиллагаа удаан байгаа нь дэд бүтцийг хамгаалж, хүн амины эрсдэл учруулахгүй байхад чиглэсэн гэж мэдэгдсэн байна. Гэхдээ “дайснаа ялж гарахын” тулд ажиллагаагаа “үргэлжлүүлэх болно” гэж мэдэгджээ.