Ковид-19 цар тахлын үед америкийн иргэд хөл хорионд орж, амны хаалт зүүж, хүн хоорондын зай барих горимыг чанд мөрдөхөөс аргагүй нөхцөлд амьдарч байсан. Энэ удаа тэд цар тахалтай холбоотой өөр нэг зохицуулалт горимыг халж байна. Пүрэв гарагаас эхлэн АНУ-д коронавирусний нийгмийн эрүүл мэндийн онц байдлыг цуцалсан байна.

АНУ-ын засгийн газрын албаныхан тус улсад халдварын тохиолдол харьцангүй цөөн байх үед буюу 2020 оны 1-р сард анх ийм онц байдал тогтоож байжээ. Удалгүй вирусийн тархалт газар авч, эмнэлгүүд ачааллаа дийлэхгүйд хүрсэн байна. Улмаар АНУ-д 1,1 сая хүн нас баржээ. Коронавирусний халдварыг нийтийн эрүүл мэндийн онц байдлын зэрэглэлд оруулснаар эмч мэргэжилтнүүдэд илүү уян хатан нөхцөлөөр ажиллах боломж олгосны зэрэгцээ сая сая хүмүүсийг эрүүл мэндийн үйлчилгээг өргөжүүлсэн байна.

Мөн олон улсад зорчигчид болон холбооны алба хаагчдыг вакцинжуулах нөхцөл бүрдүүлжээ. Ийнхүү дархлаажуулалт өргөн хүрээтэй явагдсанаар халдварын тохиолдлын тоо оргил үеийнхээсээ 95 хувиар буурсан байна. Улмаар Цагаан ордны түшмэд “цаашид ийм онц байдлын арга хэмжээ” шаардлагагүй гэж үзжээ. Гэхдээ дархлаажуулалтыг одоогоор үнэ төлбөргүй хэвээр үлдээнэ гэж мэдэгдэж байна. Харин шинжилгээ болон эмчилгээний тал дээр зарим Америкчууд одооноос шинэ зардлуудтай тулгарч мэдэх нь байна. Өнгөрөгч сард засгийн газрын албаныхан “онц байдлын” дэглэмтэй холбоотойгоор эрүүл мэндийн систем болон эдийн засагт дэмжлэг болж байсан зарим тусгай арга хэмжээг зогсоосон. Гэвч ажил бизнес эрхлэгч олон хүн цар тахлын уршиг үр дагаврыг өнөө хэр амссан хэвээр байна. Зоогийн газрын менежер Жеффри ЛаПадула, “Энэ бол дасан зохицох л асуудал. Ажил хэргийн тэс өөр нөхцөл уур амьсгал бүрэлдэх болсон” гэж ярьж байна.

Мөн хүмүүсийн зарим нь өнөө хэр гэрээсээ ажилласан хэвээр байгаа учраас эднийх даваа болон баасан гарагийн үйлчлүүлэгчдийнхээ талыг алдсан гэж ярьжээ. ДЭМБ Ковид-19-ийг хойшид дэлхийн хэмжээнд онц байдал учруулахааргүй болсон гэж зарласнаас хэдхэн өдрийн дараа АНУ-д онц байдлын үеийн арга хэмжээг ийнхүү цуцалж байна.