НҮБ болон Турк, Украин, Оросын албаныхан туркийн Истанбул хотод уулзаж, Украины үр тариаг Хар тэнгисээр дамжуулан экспортлох хэлэлцээрийн цаашдын хэтийн төлөвийн талаар хэлэлцсэн. Сүүлийн хоёр өдөр явагдсан энэ яриа хэлэлцээ гэхдээ зөвшилцөлд хүрч чадалгүй өндөрлөж байгааг хэвлэлүүд уламжилж байна.

Туркийн Гадаад хэргийн сайд Мевлут Чавушоглу лхагва гарагт хэлэлцээрийг 2 юм уу түүнээс дээш сараар сунгах бодолтой байгаа талаараа мэдэгдэж байсан. Гэвч тус улсын БХЯ-наас өчигдөр мэдээлснээр, энэ тал дээр ахиц гараагүй, гэхдээ дөрвөн талт техник зөвлөгөөнөө талууд үргэлжлүүлэх тохироотой тарсан байна. Харин Украины Ерөнхий сайдын орлогч Олександр Кубраков мөн үр тарианы хэлцлийг илүү урт хугацаагаар сунгах, бас хүрээг нь өргөжүүлэх ёстой гэсэн байр суурьтай байна. Тэрээр мөн хэлэлцээг цахимаар үргэлжилнэ гэж үзэж байгаагаа мэдэгджээ. Орос харин, хэлцлийн хугацааг сунгахаас урьтаж, өөрийн ХАА-н бүтээгдэхүүн, түүний дотор бордооны нийлүүлэлтийг өргөжүүлэх тусгай шаардлагууд тавьж байгаа юм байна. Оросын ГХЯ-ны дэд сайд Сергей Вершинин хэлэлцээний дараа Тасс-д ярихдаа, Орос улс хэлэлцээрийг өргөжүүлэх эсвэл хугацаагүй сунгах гэсэн өрнөдийн зарим улсын мэдэгдлийн эсрэг байгааг мэдэгджээ. Оросын үр тариа, бордоог хоригоос чөлөөлөх тухай өрнөдийн орнуудын мэдэгдэл хэрэгжихгүй байгаа нь эдгээр бүтээгдэхүүний экспортод ноцтой саад тээг учруулж байгааг Оросын сайд цохон дурдсан байна. Улмаар Оросын тавьсан хүсэлт шаардлагуудаар зөвшилцөлд хүрэхгүй нөхцөлд Үр тарианы хэлцэл гэж цаашид үгүй болно гэж тэр хэлсэн байна. Энэ нь, 5 сарын 18-нд хүчинтэй хугацаа нь дуусгавар болсны дараагаас ОХУ хэлэлцээрээс гарч болзошгүй гэсэн санаа байж болохыг хэвлэлүүд дурдаж байна.

Украины Хар тэнгисийн боомтуудаас үр тариаг аюулгүй тээвэрлэж дэлхийн зах зээлд гаргах зорилготой “Үр тарианы санаачилга” хэлэлцээрийг НҮБ болон Туркийн зуучлалаар өнгөрсөн оны 7-р сард анх байгуулж байсан. Дайны хөлд нэрвэгдсэн боловч сая сая тонн хүнсний бүтээгдэхүүнээ хилийн чанад руу тээвэрлэж гаргах боломжийг Украинд олгосон. Украин наран цэцгийн тос, эрдэнэ шиш, улаан буудай, шар буурцгийн дэлхийд томоохон ханган нийлүүлэгч орны тоонд ордог. Үр тарианы хэлцлийг сунгах зайлшгүй шаардлагатай, ОХУ энэ хэлэлцээрээс гарах нөхцөлд дэлхийн хүнсний хангамжид ихээхэн бэрхшээл тулгарах болно гэж НҮБ, тэр дундаа Дэлхийн хүнсний хөтөлбөрийн тэргүүн онцлон анхааруулж байна.

НҮБ-ын Дэлхийн хүнсний хөтөлбөр байгууллага өнгөрсөн онд, улаан буудайн нийт худалдан авалтынхаа талаас илүү хувийг Украинаас авчээ. НҮБ оросын ХАА-н бүтээгдэхүүний нийлүүлэлтийг хөнгөвчлөхөд Москвад дэмжлэг үзүүлэх байр суурьтай байгаа юм байна.