Өнгөрсөн онд Энэтхэгийн Оросоос авсан нефтийн импортын хэмжээ 10 дахин өссөн байна. Ийнхүү Оросоос нефть авах хэмжээгээ нэмэгдүүлснээр Азидаа гуравт ордог том эдийн засагтай Энэтхэг улс 5 тэрбум долларын хэмнэлт хийснийг Энэтхэгийн төрийн мэдлийн “Бэнк оф Барода” банкны мэдээ баримт харуулжээ.

Украины дайнтай холбоотойгоор өрнөдийн орнууд Оросоос эрчим хүчний түүхий эд импортлохоо эрс бууруулсан. АНУ болоод Европын шахалтаас үл хамааран Энэтхэг улс Оросын импортыг хориглох өрнөдийн хоригт нэгдэхээс татгалзсан байр суурь баримталж байгаа. Оросын Украин дахь цэрэг дайны ажиллагааг мөн ил тод буруутгахаас түдгэлзэх бодлого барьж байгаа Нью-Дели, нефтийн импортоос хараат, дээрээс нь сая сая хүн ард нь ядуу т арчиг амьдралтай улсын хувьд илүү өндөр үнэ төлөх боломжгүй гэж мэдэгддэг байна. Энэтхэг нефтийн импортоороо дэлхийд гуравт ордог. Харин ОХУ Энэтхэг болон Хятадад нефтиэ хямдралтай үнээр борлуулж байгаа юм. Улмаар 2021 онд Энэтхэг түүхий нефтийн импортынхоо дөнгөж хоёр хувийг Оросоос авч байсан бол, одоо энэ үзүүлэлт одоо бараг 20 хувьд хүрч өссөнийг “Бэнк оф Барода”-гийн мэдээ харуулж байна. Санхүүгийн сүүлийн нэг жилд Оросоос нефть худалдаж авснаар Энэтхэг түүхий нефтийн тонн тутмаас 89 доллар орчмын хэмнэлт гаргажээ. Үүний зэрэгцээ Украины хямрал мөддөө шийдэгдэх төлөв харагдахгүй байгаагаас үүдэж зарим шинжээчид ОХУ-ыг цаашид ч Азийн томоохон импортлогч улсуудад хямд нефть нийлүүлэлтээ үргэлжлүүлнэ гэж үзэж байна. Энэ зуур Оросын Сангийн яам энэ оны эхний 4 сард нефть болон хийн худалдааны орлого жилийн дүнгээрээ 52 хувиар унаж, 2,3 их наяд рубль буюу 30,2 тэрбум ам.доллар болсныг мэдээлсэн байна.

Өнгөрөгч 1-4-р сард орлого ингэж буурсныг Сангийн яам “Уралс” маркийн нефтийн үнэ унаж, байгалийн хийн экспортын хэмжээ буурсан”-аар тайлбарлажээ. Мөн хугацаанд төсвийн нийт алдагдлын хэмжээ 3,4 их наяд рубль болсны дээр, төсвийн орлогын нийт хэмжээ 7,8 их наяд рубль буюу 44 тэрбум ам.доллар болсон гэж оросын сангийн яамны мэдээлэлд дурдсан байна. Энэ нь өнгөрсөн оны мөн үеийнхээс 22 хувиар буурсан дүн юм байна.

Харин Кремль улс орных нь эдийн засгийн нөхцөл байдал бүрэн хяналтад байгаа гэж мэдэгдэж байна. Кремлийн хэвлэлийн төлөөлөгч Дмитрий Песков энэ тухайд өчигдөр хийсэн мэдэгдэлдээ, төсвийн алдагдлын жилийн дүн төлөвлөж байсан хэмжээнээс хэдийн давсан ч гэлээ Орост шаардлагатай бат бэх нөөц бий гэсэн байна.