Өнгөрсөн 7 хоногт Газын зурваст сөргөлдөгч талуудын мөргөлдөөн хурцдаж, хэд хэдэн пуужингийн довтолгоон болж цэрэг армийн болоод энгийн иргэд хэд хэдээрээ амиа алдсан. Үүнтэй холбогдуулан Газын зурваст ачаа тээвэр нэвтрүүлдэг гол гарцыг Израилын талаас хаасан байсан. Харин Ням гарагт тус гол терминалыг дахин нээсэн байна.

Эрх баригч Хамас бүлэглэл хэрэв энэ гарц хаалттай хэвээр удвал Газын зурвас дахь цорын ганц цахилгаан станцыг хаахад хүрч болзошгүй хэмээн анхааруулсан. Энэ тохиолдолд угаас хүнд байдалд байгаа эрчим хүчний хямрал бүр гүнзгийрэх тул гол гарцыг нээсэн болов уу гэж хэвлэл мэдээллийн хэрэгслүүд дурджээ. Өнгөрсөн 7 хоногийн Мягмар гарагт Газын зурваст эхэлсэн Израилын хүчин болон зэвсэгт дайчдын хурцадмал мөргөлдөөн 5 хоног үргэлжилж 33 Палестин, хоёр Израил хүний аминд эрсэджээ. Хэдийгээр олон улс гал зогсоохыг уриалж байгаа боловч хэдий удаан үргэлжлэх эсэх нь тодорхойгүй байна гэж эх сурвалжууд мэдээлжээ. Мягмар гарагт  Израилын нисэх онгоцууд Исламын Жихад бүлэглэлийн гурван дээд командлагчийг устгаснаар энэ мөргөлдөөн ширүүссэн юм. Үүний дараа зэвсэгт бүлэглэл хэд хэдэн удаа гал нээж хариу довтолсон. Бямба гаригийн орой Египетийн зуучлалаар гал зогсоох хэлэлцээр байгуулсан гэж мэдэгдсэн, үүнээс өмнө сөргөлдөгч талууд ажиллагаагаа улам өргөн хүрээнд явуулна гэж сүрдүүлсэн мэдэгдэл хийсээр байсан. Даваа гарагийн өглөөний байдлаар гал зогсоох хэлэлцээр байгуулснаар Ашкелоны оршин суугчид тайван амгалан байдалтайгаар өглөөг угтаж, дэлгүүр кафе ажиллаж эхэлсэн байна. Энэ тайван байдлыг алдагдуулж болох цорын ганц зүйл бол дараагийн  тэмцэл болно гэдгийг бид бүгд мэдэж байгаад юм. Үүнийг бүрмөсөн шийдэх хэрэгтэй гэж Ашкелон хотын оршин суугч Адам Кафри хэлжээ.