Баян-Өлгий аймгийн Өлгий сумын 2, 3, 4, 12, 13 дугаар багууд /сумын төвд/ долоодугаар сарын 18-ны өдрийн 22:40-23:00 цагийн хооронд түр зуурын усархаг бороо орсны улмаас Их булан, Бөхөн-Уул, Цагаан-Эрэг, Ногоон багийн зарим айл өрхүүд усанд автсан тухай дуудлагыг долоодугаар сарын 18-ны өдрийн 23:00 цагт хүлээн авсан Тус аймгийн Онцгой байдлын газар, Цагдаагийн газрын алба хаагчид, аймгийн Засаг даргын Тамгын газрын ажилтнууд, Өлгий сумын мэргэжлийн ангийнхан, орон нутгийн иргэд ажиллаж байна.

Үерийн усанд нийт 5 багийн 210 өрхийн гэр, байшин автсан бөгөөд долоодугаар сарын 19-ний өдрийн 23:00 цагийн байдлаар тусламж шаардлагатай байсан 54 өрхийн 145 иргэнийг аюулгүй газарт нүүлгэн шилжүүлж, усанд автсан 40 гэр, байшингийн 597 тн орчим усыг соруулж аюулгүй болгосон. Мөн 16 метрийн урттай хамгаалалтын даланг байгуулж, 5 байршилд 6 метрийн гүнтэй нүх ухаж усыг газарт нь шингээх ажиллагааг зохион байгуулаад байна. Долоодугаар сарын 20-ны өдөр үерийн усаар орж ирсэн лаг шавруудыг цэвэрлэх, халдваргүйжүүлэлтийн ажлыг зохион байгуулж байна. 

Архангай аймгийн Эрдэнэбулган сумын Тамир багийн “Тамир” хороолол, 12 дугаар гудамжинд долоодугаар сарын 19-ний өдрийн 19:05 цагийн орчимд орсон түр зуурын аадар борооны улмаас 1 өрхийн гэр, 2 аж ахуй нэгжийн байр, 1 орон сууцны байрны зоорийн давхар усанд автсан тухай дуудлагыг мөн өдрийн 19:53 цагт хүлээн авсан. Тус аймгийн Онцгой байдлын газрын алба хаагчид ажиллаж нийтийн орон сууцны байрны зоорийн давхар усанд автсан байсан 17 тн орчим усыг соруулж аюулгүй болгосон байна.

Өмнөговь аймгийн Ханбогд сумын Хайрхан багийн “Цагаан хад” суурьшлын бүс /аймгийн төвөөс зүүн урд зүгт 344 км-т, сумын төвөөс урд зүгт 100 км-т/ долоодугаар сарын 19-ний өдрийн 17:30 цагаас 18:00 цагийн хооронд орсон түр зуурын аадар борооны улмаас тухайн суурьшлын бүс дэх айл өрхийн гэр, аж ахуй нэгж байгууллагын байр усанд автсан тухай дуудлагыг мөн өдрийн 18:20 цагт хүлээн авсан Тус аймгийн Онцгой байдлын газрын Ханбогд сум дахь Гал түймэр унтраах, аврах 66 дугаар ангийн алба хаагчид үерийн даланг сэтлэн усыг урсгаж гадагшлуулах, усыг соруулах ажиллагааг зохион байгуулж, долоодугаар сарын 20-ны өдрийн 00:37 цагт аюулгүй болгожээ.

Өнөөдөр говийн аймгуудын нутаг, зүүн аймгуудын нутгийн өмнөд хэсгээр усархаг аадар бороо орох тул нөөлөг салхи, аянга цахилгаан, үер усны аюулаас сэрэмжтэй байхыг анхааруулж байна.  

Эх сурвалж: ОБЕГ