Өмнөд Солонгосын жүжигчин, Оскарын шагналт “Парасайт” киноны од И Сон Гюнь өнөө өглөө Сөүлийн төв цэцэрлэгт хүрээлэнгийн ойролцоо автомашиндаа угаартаж амиа алдсан байдалтай олдсон байна.

Цагдаа нар зорчигчийн суудал дээрээс нүүрсний хэлтэрхий олсон, одоогоор түүнийг амиа егүүтгэсэн эсэхийг тогтоогоогүй гэж мэдэгдсэн байна.

Солонгосын хэвлэлүүдийн мэдээлж байгаагаар И Сон Гюнь урьд шөнө гэртээ тэмдэглэл үлдээгээд гарч явсан гэсэн мэдээллийг цагдаагийн алба хүлээн авсан байна. И Сон Гюнь нь өнгөрсөн 10 дугаар сард хар тамхины хэрэгт холбогдож, цагдаагийн газарт байцаагдаж байсан юм.

Түүний холбогдсон хэрэг нэлээд ярвигтай. И Сон Гюнийг шөнийн цэнгээний газар хар тамхи хэрэглэсэн гэж сэжиглэж байсан ч жүжигчин эр тухайн үед өөрт нь өгсөн зүйл мансууруулах бодис байсныг мэдээгүй гэдэг мэдүүлэг өгч байсан байна.

Мөн хэд хэдэн шинжилгээгээр түүнийг хар тамхи хэрэглээгүй, мөн тогтооход боломжгүй гэсэн хариу гараад байсан юм.

Шөнийн цэнгээний газрын ажилтан харин түүний эсрэг мэдүүлэг өгсөн. Жүжигчин И Сон Гюнь улмаар худал яриа шалгагч төхөөрөмж ашиглахыг хуульчаараа дамжуулж хүссэн байсан юм.

Энэ хэрэг Өмнөд Солонгост нэлээд шуугиан тариад байсан тул алдартай жүжигчин эрийн нэр хүндэд томоохон нөлөө үзүүлээд амжсан.

Энэ хэргийн эргэн тойрон дахь шуугианы улмаас 10 дугаар сард эхлэх байсан хэд хэдэн киноны зураг авалтаасаа халагдсан юм байна.