Өнгөрөгч өдрүүдэд орсон ширүүн бороонд олон автомашин улсын дугаараа хаясан байна. Харин замын усанд үлдсэн улсын дугааруудыг нэгэн залуу цуглуулан ойролцоох гэрлийн шонд нааж үлдээсэн нь олон хүнд буян болж, жолоочдын талархалыг хүлээгээд авчээ. Зарим жолооч нэр нь үл мэдэгдэх тэрхүү сайхан сэтгэлт залууд өөрсдийн фэйсбүүк хуудсаараа дамжуулан талархал илэрхийлсэн байна.

Тэрбээр өөрийн фэйсбүүк хуудаснаа “Өчигдөрийн ширүүн борооны үерт явж байгаад автомашины дугаараа гээсэн байлаа. Шинээр дугаар авах гэтэл “Заавал даваа гарагт автотээврийн төв дээр очиж торгууль төлж байж зөвшөөрөл авч ир. Тэр үед хийж өгнө” гэж дугаарын үйлдвэрүүд хэлж байх юм. Гэтэл гэрлүүгээ ирж яваад машиныхаа дугаарыг олж харлаа. Үүнийг хийж тавьсан залууд талархалаа илэрхийлмээр байна. Хүмүүсийн хэлж байгаагаар нэг залуу уснаас бүх дугааруудыг гаргаж ингэж тавьсан гэсэн. Энэ залууд баярлалаа. Автозамын газрынхан ус зайлуулах суваггүй замыг хууль бусаар хүлээн авч өөрийн өврийг түнтийлгэж байхад энэ залуу хэнээс ч нэг ч төгрөг нэхэлгүйгээр сэтгэлээрээ үүнийг хийж тавьжээ. Түүнд талархаж байгаагаа дахин илэрхийлье” гэжээ.