Энэ онд л гэхэд Герман улс ойролцоогоор 800 мянган дүрвэгч хүлээн авах тооцоо гарч байна. Сүүлийн 10 хоногт л гэхэд тус улсад 30-аад мянган дүрвэгч иржээ. Үүнээс үүдэж германчуудын дунд, Герман улс ийм олон дүрвэгчийг шингээх үү? гэсэн болгоомжлол газар авч байна.

Иймд Германы засгийн газар улс оронд ирж байгаа дүрвэгчдийн тоог багасгахын тулд цагаачдад орогнол олгох дүрэм журамд нэмэлт өөрчлөлт оруулах, чангатгах тухай хуулийн төсөл боловсруулсан байна. Хууль хүчин төгөлдөр болохын тулд одоо парламент хэлэлцэж батлах ёстой.

Засгийн газраас санал болгож буй нэмэлтэд эдийн засгийн үүднээс орогнол олгохыг хүсэгчдийг Германаас шууд гаргах, мөн Германд байх хугацаа нь дууссан дүрвэгчдийг ямар ч анхааруулаггүй хөөн гаргах заалтууд тусгагджээ. Үүнээс гадна Албани, Босни, Косово, Черногори улс хүн амьдарахад аюулгүй орнуудын жагсаалтад орсон тул эдгээр орноос ирсэн дүрвэгчдийг буцаахаар шийдвэрлэсэн байна.

Энэ хуулинд тусгасан бас нэг онцлох зүйл гэвэл цагаачлалын хууль зөрчигчдийг газар дээр нь барьж, шууд нутаг буцаах юм байна. Үүнээс гадна Германы засгийн газар ирэх 2016 оноос эхлэн холбооны мужуудад нэг цагаачид, анх бүртгүүлснээс хойш асуудлыг нь шийдэж дуусах хүртэлх хугацаанд сард 670 евро олгож байх санхүүжилтийг шийджээ. Ирэх онд холбооны мужууд энэ зорилгоор холбооны төсвөөс 2,68 тэрбум евро авна. Мөн засгийн газар 2016-2019 онд халамжийн орон сууц барих ажилд жил бүр 500 сая евро гаргаж байхаар болжээ.

Ирэх сард парламент хуулийн төслийг хэлэлцэн дэмжсэн тохиолдолд 11-р сарын 1-нээс хүчин төгөлдөр мөрдөгдөх юм.