Огцом хүйтэрсэн сүүлийн өдрүүдэд ханиад томуугийн дэгдэлт харьцангуй эрт идэвхжиж эхэлсэн байна. Шинж тэмдгийн хувьд ханиад гэхээргүй илэрдэг шинэ төрлийн вирус дэгдсэн гэсэн мэдээлэл тархаад байна.

Эх, хүүхдийн эрүүл мэндийн үндэсний төвийн яаралтай тусламжийн тасгаар хоногт 200 орчим хүүхэд үзүүлдэг. Тэдний 70 хувь нь ханиадаа хүндрүүлж, томуу, томуу төст өвчнөөр халдварласан байдаг. Хүүхдэд дөнгөж эхний шинж тэмдэг илрэхэд л өрхийн эмчдээ хандаж, мэргэжлийн тусламж авах ёстой. Гэтэл эцэг, эхчүүд дур мэдэн эмчилж, зарим тохиолдолд  хайхралгүй явсаар өвчнийг хүндрүүлдэг байна.

Эмчийн бичсэн жороор зааврын дагуу эмчилдэггүй. Эмийн эмчилгээгээ дуустал тууштай хэрэглээгүйгээс эмэнд дарагдахгүй хүндрэх тохиолдол олон гардаг. Сүхбаатар дүүргийн нэгдсэн эмнэлэг 125 ортойгоос өнөөдрийн байдлаар 100 гаруй хүүхэд хэвтэн эмчлүүлж байна. Томуугаар өвчлөгсдийн 70 хувийг дөрөв хүртэлх насны хүүхдүүд эзэлдэг байна.

Улсын хэмжээнд үйл ажиллагаа явуулж байгаа томоохон эмнэлгүүдэд томуугийн дэгдэлтийн үед эм, эмнэлгийн хэрэгслийн хүрэлцээг нэмэгдүүлэх зорилгоор төсөв гаргаж өгсөн. Эх, хүүхдийн эрүүл мэндийн үндэсний төвд гэхэд томуугийн үед ачаалал авна гэж тооцоод тогтмол хэрэглэх зардал дээр нь 180 сая төгрөг суулгаж өгчээ.

Томуугийн вирус бол хүйтэнд маш тэсвэртэй. Өөрөөр хэлбэл, хүйтний эрч чангарах тусам вирусын идэвхжил нэмэгддэг гэсэн үг. Тиймээс хүүхдээ дулаан хувцаслах, дархлааг нь дэмжих, гараа тогтмол угааж хэвших, ханиад хүрсэн тохиолдолд бүрэн эмчилж цэцэрлэг, сургуульд нь хүргэж байх хэрэгтэйг мэргэжилтнүүд санууллаа.