Монгол цэргийн өдөр, Зэвсэгт хүчний 95, Монгол цэргийн музей байгуулагдсаны 50 жилийн ойд зориулсан “Монгол цэрэг” үзэсгэлэнгийн нээлт өнөөдөр Монгол цэргийн музейд боллоо.

Монголын эрэлхэг хөвгүүдийн дайчин ялалтын түүх, яруу алдар, тэдний түүчээ өнөөг хүртэл оршин байгааг илтгэн харуулах зорилготой энэхүү үзэсгэлэнг  Батлан хамгаалахын яам, Зэвсэгт хүчний жанжин штаб, Архивын ерөнхий газар, Батлан хамгаалахын төв архив хамтран зохион байгуулсан юм.

Үзэсгэлэнд Монгол цэргийн хэрэглэж байсан цавчих, хатгах зориулалт бүхий 20 гаруй илд, жад, Монгол Ардын армийн холбогдолтой марк, зурагт хуудас, ил захидал зэрэг дэлгэгдсэн байв.

Нээлтийн үйл ажиллагаанд БХЯ, “Монгол генерал” төвийн гүйцэтгэх захирал, хошууч генерал З.Болдбаатар, БХЯ-ны стратегийн бодлого, төлөвлөлтийн газрын дарга, хурандаа Г.Сайханбаяр, Батлан хамгаалахын төв архивын дарга Д.Номч, үндэсний төв архивын төвийн эрхлэгч М.Эрдэнэбат, Чингэлтэй дүүргийн цэргийн штаб, оюутан залуус оролцов.