Монгол Улсын Аж үйлдвэрийн яам, НЗДТГ, Хөрөнгө оруулалтын газар, Монголын томоохон үндэсний үйлдвэрлэгч аж ахуйн нэгжүүд хамтран ӨМӨЗО-ны Бугат хотод “Монголын өдрүүд-2016” үйл ажиллагааг зохион байгууллаа. Тус үзэсгэлэн худалдаанд үндэсний үйлдвэрлэгч 100 гаруй аж ахуйн нэгж оролцож, Монголд үйлдвэрлэсэн 1000 орчим нэр төрлийн бараа бүтээгдэхүүнээ дэлгэн сонирхуулсан юм.

Төрөөс аж үйлдвэрийн салбарт баримталж байгаа гол бодлогын нэг нь нэмүү өртөг шингээсэн бүтээгдэхүүн үйлдвэрлэлийг нэмэгдүүлж, дотоодын зах зээлийг хангахаас гадна экспортод гаргах. Тиймээс гурван сая хүн амтай Бугат хотод Монголын бүтээгдэхүүн танигдсанаар зах зээл нь хоёр дахин өргөжих боломж бүрдэж байгаа юм.

Бугат хот нь БНХАУ-ын нэр алдартай 100 гаруй хотоос өөрийн гэсэн өвөрмөц онцлогтой, эдийн засгийн хөгжлөөрөө тэргүүлдэг аж. 2015 оны хувьд 315 тэрбум иений орлоготой ажиллажээ. Энэ удаагийн арга хэмжээгээр Улаанбаатар-Бугат хотын хооронд агаарын хил нээх, байнгын ажиллагаатай болсон Ханги-Мандалын боомтын дэд бүтцийг шийдэх, Сайншанд-Ханги-Мандалын чиглэлд авто болон төмөр зам тавихад хамтран ажиллах чиглэлд гэрээ хэлцэл байгууллаа. Ингэснээр Монгол Улсын малын гаралтай бүтээгдэхүүнийг импортоор авах боломж нээгдэж байна.