Аваргуудын лигийн 1/4 шигшээд учраа таарсан Испанийн грандууд болох “Атлетико”-“Барса” багийн хариу тоглолт “Висенте Кальдерон” цэнгэлдэхэд болж, талбайн эзний ялалтаар өндөрлөлөө.

Тоглолтын 36 дахь минутанд Саулийн дамжуулалтыг Антуан Гризманн чулуу болгож багтаа тэргүүлэл авчирсан бөгөөд үүний дараа “Барса” хэд хэдэн удаа аюултай довтолгоо хийсэн ч тусыг эс олов.

Уг тоглолтын эцсийн цэгийг мөн л Антуан Гризманн тавьсан бөгөөд 11 метрийн торгуулийн цохилт амжилттай гүйцэтгэсэн.

Долоо хоногийн өмнө болсон хоёр багийн эхний тоглолтод “Барса” 2:1-ээр хожсон ч хоёр тоглолтын нийлбэрээр (3:2) Мадридын баг дараагийн шат буюу шөвгийн дөрөвт шалгарлаа.

Тоглолтын дараа "Барса"-гийн дасгалжуулагч Луис Энрике “Энэ өдөр биднийх биш байлаа. Барса өөрийн шилдэг тоглолтыг гаргаж чадсангүй. Тэгээд ч багийнхаа залуусын тухай муу юм хэлэх нь одоо утгагүй хэрэг” гэсэн бол Атлетикогийн дасгалжуулагч Диего Симеоне “Шөвгийн дөрөвт үлдэнэ гэдэг маш том амжилт ч, сенсаци болохоор хэрэг ердөө ч биш. Бид илүү амжилт үзүүлж чадна" гэв.