Сүүлийн үед “Болор цом” наадмыг иргэд ихэд шүүмжилдэг болсон. Иймд зарим зохиолч, яруу найрагч өөрийн фейсбүүк хуудсаараа дамжуулан санал сэтгэгдэлээ хэлж эхлээд байна. Тэдний нэг нь МЗЭ-ийн шагналт, зохиолч, яруу найрагч Х.Болор-Эрдэнэ юм. Тэрбээр “Болор цом” наадам байж л байг л дээ. Хүнээс ямар хоол нэхээд байгаа биш. Буруу зөрүү тунхаг явуулаад байдаг биш. Болдогоороо болоод, уралддагаараа уралдаад, үзэх нэг нь үзээд, үзэхгүй нь болино л биз. Ингэж явсаар 100 жил болвол “Болор цом”-ын музей, түүх, судалгаа, архив, цуглуулга гээд уран зохиолд сайхан баялаг өв л бий болох байх. Ямар ч ажил унаж босож, гундаж мандаж л явдаг хойно хэсэг сулраад явлаа гэхэд бас чангараад часхийгээд босоод ирэх үе гарна шүү дээ. Мэдрэмжийг уралдуулах нь утгагүй ч гэсэн хүн төрөлхтөн энэ байтугайг уралдуулаад ирсэн юм чинь. Манай “Болор цом”-ыг дэлхий даах байлгүй дээ” гэсэн байв.