Туялзуур сэлэмний "Улаанбаатар-2017" өсвөр үе, залуучуудын улсын аварга шалгаруулах тэмцээн саяхан болсон билээ.

Дөрөв дэх жилдээ зохион байгуулагдсан тус тэмцээнд дөрвөн клубын 69 тамирчин оролцож, “Уурхайчин” клуб багийн дүнгээр хоёр дахь жилдээ дараалан түрүүлсэн юм.

Харин "Хангарьд" клубын тамирчин Б.Хаш-Эрдэнэ давхар цохилт хийж, өсвөр үе, залуучуудын ангилалд түрүүлсэн бол У.Маргад-Эрдэнэ (Уурхайчин) мөн хоёр мөнгөн медаль хүртсэн. Тамирчин Ө.Хишигдэлгэр (Уурхайчин) өсвөрийн ангилалд түрүүлж, залуучуудын ангилалд хүрэл медаль авсан юм.

17 хүртэлх насны өсвөрийн ангилалд Т.Тулуй (Хангарьд), Г.Сумъяабалдан (Уурхайчин) нарын 13 настай хүүхдүүд медаль хүртсэнээр шинэ үе төрөн гарч ирж буйг харууллаа. Залуучуудын ангилалд Б.Амарзаяа (Уурхайчин) өнгөрсөн жилийн аваргаа хамгаалж түрүүлсэн бол 2016 онд өсвөрийн улсын дэд аварга болсон Ө.Хишигдэлгэр (Уурхайчин) амжилтаа ахиулж, улсын аварга болсон юм.

Энэхүү тэмцээнийг Японы Имабэцү хотын дарга Ёшихарү Абэ, Спортын газрын дарга Ёшиаке Оба нар үзэж сонирхжээ. Тэр үеэр УАШТ-нд түрүүлсэн тамирчид Японы Аомори мужийн Имабэцү хотод хамтарсан бэлтгэлд хамрагдах эрх олгов.

Сонирхуулахад өсвөр, залуу тамирчдын энэ оны олон улсын анхны тэмцээн болох Азийн аварга шалгаруулах тэмцээн Тайландын нийслэл Бангкок хотноо ирэх сарын 25-30-нд болно.