Тиймээс компанийн сайн засаглалыг хөгжүүлэн төлөвшүүлэх үндэсний хөтөлбөрийн хүрээнд төрийн болон төрийн бус байгууллагын оролцоо бүхий Компанийн засаглалын Үндэсний зөвлөл байгуулагдан ажиллаж байна. Энэхүү Үндэсний зөвлөлийн даргаар нь СЗХ-ны гишүүн Д.Ганбаяр ажилладаг бол гишүүдээр нь Г.Эрдэнэбаяр /Монголбанкны Хууль эрхзүйн газрын захирал/, С.Бэхбат /ЭЗХЯ-ны Инноваци төр-хувийн хэвшлийн түншлэлийн газрын дарга/, Б.Нямаа /Сангийн яамны Санхүүгийн бодлого, өрийн удирдлагын газрын Санхүүгийн зах зээл, даатгалын хэлтсийн дарга/, Б.Одонбилэг /ТӨХ-ны хуулийн мэргэжилтэн/, Х.Алтай /МХБ-ийн гүйцэтгэх захирал/, Д.Батжаргал /КЗҮЗ-ийн ТУЗ-ийн дарга, СЭЗДС-ийн захирал/, Ч.Нэргүй /МҮХАҮТ-ийн Нэгдсэн бодлого төлөвлөлт зохицлалтын газрын дарга/, Ч.Нанжидсамбуу /МАОЭНХ-ны Бизнесийн харилцааны албаны дарга/ нар тус тус сонгогдон ажилладаг ажээ.

 

Тус зөвлөлөөс компанийн засаглалыг сайжруулах талаар тодорхой ажлуудыг хийсэн байна. Тухайлбал хувьцаат компани, төрийн өмчит хувьцаат компани болон олон нийтээс хөрөнгө татан төвлөрүүлсэн, нийтийн ашиг сонирхлын төлөө ажилладаг компанийн засаглалын өнөөгийн байдлыг судалж хамгийн анхны судалгааны тайланг өнөөдөр хэвлэн гаргажээ.

 

Энэ талаар КЗХТ-ийн захирал Ж.Үнэнбат "Компанийн засаглалын Үндэсний зөвлөлөөс Монгол Улсын компанийн засаглалын өнөөгийн байдлын талаар судалгаа хийж, тайлан гаргалаа. Монголын эдийн засагт голлох байр суурь эзлэх байгууллагуудад судалгаа хийсэн. Энэхүү тайлангаа өнөөдөр нийтэд танилцуулж байна. Түүнчлэн тус тайлангаас үүдэн Үндэсний зөвлөлөөс зөвлөмж гарч байгаа" гэлээ.